Hacıqabul Quşçuluq Şirkəti MMC-nin nümayəndə heyəti Sabirabad Dövlət Sosial-İqtisadi Kollecində müəllim-tələbə heyəti ilə maarifləndirici görüş keçirib.
 
Liderxeber.az xəbər verir ki, görüşdə kollecin rəhbərliyi, müəllim heyəti, tələbə və məzunları ilə görüşlər keçirilmiş, şirkətin fəaliyyəti, karyera imkanları və istehsalat sahələri barədə geniş təqdimat təqdim olunmuşdur.
 
Təqdimat zamanı şirkətin fəaliyyəti, yaranma tarixi, istehsalat sahələri, istehsal gücü, struktur bölmələri, işə qəbul prosesi barədə və ixtisaslı kadrlara olan tələbat barədə iştirakçılara ətraflı məlumat verilmiş, tələbələrin sualları cavablandırılmışdır. Tələbələrə təcrübə keçmək, gələcəkdə işlə təmin olunmaq və biliklərini real istehsalat mühitində tətbiq etmək imkanları təqdim olunmuşdur.
 
Tələbələrə məlumat verilib ki, Hacıqabul Quşçuluq Şirkəti 1976-cı ildə Hacıqabul rayonunun Ağacanlı kəndində təsis edilmişdir. Şirkət hazırda gündəlik 2.000.000 ədəd, illik isə 720.000.000 ədəd yumurta istehsalı gücünə malikdir. Müəssisədə qurulmuş müasir laboratoriyada məhsullar beynəlxalq standartlara uyğun olaraq keyfiyyət və təhlükəsizlik göstəricilərinə görə analiz edilir.
 
Tədbirin sonunda Hacıqabul Quşçuluq Şirkəti MMC ilə Sabirabad Dövlət Sosial-İqtisadi Kolleci arasında əməkdaşlıq memorandumu imzalanmışdır. Memorandumun məqsədi - kollecin məzunlarının ixtisaslarına uyğun olaraq işlə təmin olunması, istehsalat təcrübələrinin təşkili və yerli kadrlara öncül üstünlük verilməsi mexanizminin qurulmasıdır.
 
Bu əməkdaşlıq regionda təhsil və istehsalat arasında körpü rolunu oynayacaq, peşə təhsilli gənclərin əmək bazarına inteqrasiyasını sürətləndirəcəkdir.