İspaniya millisi ("La Furia Roja" - Qırmızı furiya) son Avropa Çempionatındakı möhtəşəm zəfərindən sonra dünya futbolunun zirvəsindəki yerini qorumaq niyyətindədir.

İspaniya ardıcıl 17-ci dünya çempionatına hazırlaşır və Qətərdə keçirilən turnirin 1/8 finalındakı uğursuzluğun əvəzini çıxmaq əzmindədir. İndi Avropa nəhənginin bütün diqqəti Kanada, Meksika və ABŞ olmaqla ilk dəfə üç fərqli ölkədə təşkil ediləcək 2026-cı il dünya çempionatına yönəlib.

Baş məşqçi Luis de la Fuentenin rəhbərlik etdiyi komanda AVRO-2024-ün qalibi kimi və 2024-25-ci illər UEFA Millətlər Liqasının finalına qədər yüksələrək, turnirə yüksək əhvali-ruhiyyədə və əsas favoritlərdən biri kimi yollanacaq. Onlar, həmçinin, demək olar ki, qüsursuz bir seçmə mərhələsi keçirərək, son oyunda Türkiyəyə qarşı böyükhesablı məğlubiyyətdən qaçmağın kifayət edəcəyini bilərək meydana çıxmışdılar. Növbəti hədəf ölkənin cığır açan "qızıl nəsli"nin izi ilə gedərək dünya çempionatını ikinci dəfə qazanmaqdır.

Liderxeber.az İspaniya futbolunun keçmişinə, bu gününə və 2026-cı il gözləntilərinə nəzər salır.

De la Fuente 19 və 21 yaşlılardan ibarət komandalardakı uğurlu fəaliyyətindən sonra 2022-ci ilin dekabrında əsas komandanın sükanı arxasına keçib. Onun fəaliyyəti DÇ-2022-nin yekununda, Luis Enrikenin rəhbərlik etdiyi komandanın 1/8 finalda Mərakeş tərəfindən mübarizədən kənarlaşdırılmasından dərhal sonra başlamışdı.

Təcrübəli mütəxəssis hücumameyilli futbol prinsiplərinə sadiq qalsa da, topa nəzarət üslubunu əks-hücumlar və sürətli keçidlərlə birləşdirərək komandanın yanaşmasına daha böyük rəngarənglik qatıb. Keçmiş cinah müdafiəçisi, eyni zamanda, İspaniyanı yenidən zirvəyə daşımaq üçün Pau Kubarsi, Din Huysen, Niko Uilyams və Lamine Yamal kimi, bir çoxu ilə aşağı yaş qruplarında da birlikdə çalışdığı son dərəcə istedadlı gənc nəsildən maksimum yararlanmağı bacarıb.

İspaniyanın ilk dünya çempionatı

İspanlar 1934-cü ildə dünya çempionatındakı debütlərində möhtəşəm təəssürat yaratmışdılar. İlk oyunlarında 1/8 finalda Braziliya kimi güclü rəqibi məğlub etmişdilər. Bunun ardınca, 1/4 finalda ev sahibi İtaliya ilə əlavə vaxtdan sonra 1:1 hesablı bərabərə qalaraq, turnir tarixində ilk heç-heçəyə imza atmışdılar. O dövrdə penaltilər seriyası hələ tətbiq olunmadığından, təkrar oyuna ehtiyac duyulmuşdu. "Azzurri" təkrar matçda 1:0 hesabı ilə qalib gəlmiş və sonda dünya çempionu olmuşdu.

İspaniyanın sonuncu dünya çempionatı

DÇ-2022 İspaniya futbol tarixinə böyük ümidlərin puç olduğu bir turnir kimi daxil olmuşdu. Luis Enrikenin çox bəyənilən komandasının vəsvəsə həddinə çatan fərqli bir üslubu var idi: topa nəzarətə üstünlük vermək, ekstremal təzyiq tətbiq etmək və hücumları müdafiədən yavaş-yavaş qurmaq. Turnirin əvvəlində diqqətləri cəlb edərək özlərini favoritlər kimi təsdiqləsələr də, ən həlledici məqamda ümidləri doğrultmamışdılar.

"Qırmızı furiya"nın turnirdəki çıxışı Kosta-Rika üzərində 7:0 hesablı sarsıdıcı qələbə ilə başlamış, ardınca Almaniya ilə gərgin keçən bərabərlik (1:1) və Yaponiyaya 1:2 hesablı məğlubiyyət gəlmişdi. Yaponlara qarşı Luis Enrikenin yetirmələrinin bahasına başa gələn "kəsərsizlik" 1/8 finalda bir daha özünü göstərmiş və ispanlar Mərakeşin möhkəm, dərin müdafiə blokunu yara bilməmişdilər. Gərgin keçən 120 dəqiqə qolsuz bərabərliklə başa çatmış, bundan sonra Şimali Afrika təmsilçisi penaltilər seriyasında qələbəni bayram etmişdi.

İspaniyanın ən yaxşı dünya çempionatı

"Qırmızı furiya"nın 2010-cu ildəki tarixi zəfəri, "tiki-taka" oyun üslubu ilə qızıl standartlar müəyyən edən bir komandanı təcəssüm etdirmişdi. Əfsanəvi mütəxəssis Visente del Boskenin rəhbərlik etdiyi heyətdə "Barselona"nın (Karles Puyol, Xavi, Serxio Buskets, Jerar Pike və Andres İnyesta) və "Real Madrid"in (İker Kasilyas, Xabi Alonso və Serxio Ramos) "El-Klasiko" ulduzları üstünlük təşkil edirdilər.

Bu nəhənglərə "Arsenal"dan Sesk Fabreqas, "Liverpul"dan Fernando Torres və "Sevilya"dan Xesus Navas kimi bir çox başqa ulduzlar da qoşulmuşdular. Klub rəqabətlərini kənara qoyan bu zəngin istedada malik oyunçu qrupu İsveçrəyə qarşı qeydə alınan ilk gözlənilməz məğlubiyyətdən sonra, demək olar ki, qol buraxmadan, həm zərif, həm də praqmatik bir tərzdə çempionluğu əldə etmişdi.

İspaniya DÇ-2026-ya vəsiqəni necə qazanıb?

İspaniya Qətərdəki uğursuzluğu qısa müddətdə unutmuş və həm Bolqarıstan, həm də Gürcüstanı hər iki matçda məğlub edərək Şimali Amerikaya, demək olar ki, qüsursuz bir yol qət etmişdi. Onların xal itirdiyi yeganə oyun evdə Türkiyəyə qarşı olmuşdu.

Konyadakı səfər matçında rəqibini 6:0 hesabı ilə darmadağın edən ispanlar Sevilyada 2:2 hesablı bərabərliklə kifayətlənərək 2026-cı il turnirinə vəsiqəni rəsmiləşdirmişdilər.

DÇ-2026-da İspaniyanın oyun cədvəli (Bakı vaxtı ilə)

İspaniya DÇ-2026-da H qrupunda Uruqvay, Kabo-Verde və Səudiyyə Ərəbistanı millilərinə qarşı mübarizə aparacaq.

H qrupu:

15 iyun, 20:00, İspaniya - Kabo-Verde (Atlanta stadionu);

21 iyun, 20:00, İspaniya - Səudiyyə Ərəbistanı (Atlanta stadionu);

27 iyun, 04:00, Uruqvay - İspaniya (Qvadalaxara stadionu).

İspaniyanın dünya çempionatlarındakı ən məhsuldar oyunçusu

İspaniya millisinin dünya çempionatları tarixində ən sərrast futbolçusu 9 qolla David Vilyadır. Hücumçu üç fərqli dünya çempionatında (DÇ-2006, DÇ-2010 və DÇ-2014) iştirak edib. O, iyulun 11-də Yohannesburqda kubokun başı üzərinə qaldırıldığı o sehrli gecədə fərqlənməsə də, "Qırmızı furiya"nın 2010-cu ildəki zəfər yürüşündə həlledici rol oynamışdı.

Digər dörd oyunçu isə hərəyə beş qolla ikinci pilləni bölüşür. Emilio Butraqenyo bütün qollarını 1986-cı ildə vurub, 1990-cı ildə isə fərqlənə bilməyib; Fernando Yerro da eyni ilə 1990-cı ili qolsuz keçib, lakin 1994-cü ildə bir, 1998-ci və 2002-ci illərin hərəsində isə iki dəfə rəqib qapılarına yol tapıb; Fernando Moryentes 1998-ci ildə iki, 2002-ci ildə isə üç dəfə fərqlənib və Raul 1998-ci ildə bir, 2002-ci ildə üç, 2006-cı ildə isə yenidən bir qola imza atıb.

Digər bir dördlük isə siyahıda dörd qolla qərarlaşıb. Estanislau Basora və Telmo Zarra 1950-ci ildəki yeganə dünya çempionatlarında məhsuldar çıxış edərək İspaniyanı dördüncü yerə daşıyıblar; Miçel 1986-cı ildəki qolsuz sükutunu 1990-cı ildə dörd qol vuraraq pozub və Fernando Torres öz qollarını Vilyanın iştirak etdiyi eyni üç turnirə (2006-da üç, 2010-da sıfır və 2014-də bir) yaymağı bacarıb.

İspaniyanın dünya çempionatlarında ən çox oyun keçirən futbolçusu

Visente del Boskenin çalışdırdığı əfsanəvi komandanın bir çox üzvü İspaniyanın dünya çempionatlarında ən çox oyun keçirən ilk onluğunda yer alır. Həmin komandanın əksər üzvü bir neçə turnirdə iştirak edib və ispanlar tərəfindən tarixin ən yaxşıları kimi böyük sevgi ilə xatırlanır.

Liderlik mövqeyini dörd fərqli dünya çempionatında 17 oyunda meydana çıxan üç dəyişməz sima bölüşür: İker Kasilyas (DÇ-2002, DÇ-2006, DÇ-2010 və DÇ-2014), Serxio Ramos (DÇ-2006, DÇ-2010, DÇ-2014 və DÇ-2018) və Serxio Buskets (DÇ-2010, DÇ-2014, DÇ-2018 və DÇ-2022). Qapıçı Andoni Subisarreta 16 oyunla onların ardınca gəlir, Xavi isə 15 oyunla ilk beşliyi tamamlayır.

İspaniyanın unudulmaz dünya çempionatı anları

Cənubi Afrikada keçirilən DÇ-2010, şübhəsiz ki, İspaniya milli komandasının bu günə qədərki tarixinin ən yüksək nöqtəsini təmsil etsə də, onların qlobal səhnədəki yeganə uğuru deyil.

Andres İnyestanın Niderlanda qarşı əlavə vaxtda vurduğu qolun əhəmiyyətini kiçiltmək mümkün deyil. Bu anın böyüklüyü, həlledici zərbənin qüsursuzluğu və son saniyələrdə vurulması, eləcə də İnyestanın mərhum Dani Xarkeyə həsr etdiyi təsirli sevinci ilə daha da dəyərli olmuşdu. Nəticələrdən kənara çıxdıqda isə, Del Boskenin komandasının bütöv bir dövrü müəyyənləşdirən zərif hücum futbolu oynadığı açıq-aşkar görünmüşdü.

Bundan əvvəl ölkə DÇ-1950-də yüksək qiymətləndirilən dördüncülüyü əldə etmişdi. Bu uğura ABŞ-yə 3:1, Çiliyə 2:0 və İngiltərəyə 1:0 hesablı təmiz qələbələrlə 2-ci qrupun lideri olmaq daxil idi. Final mərhələsindəki ilk matçında gələcək çempion Uruqvayla 2:2 bərabərə qaldıqdan sonra, ev sahibi Braziliyaya 1:6, İsveçə isə 1:3 hesabı ilə məğlub olaraq turnirlə kədərli şəkildə vidalaşsalar da, Gilyermo Eysagirrenin yetirmələri nümayiş etdirdikləri oyunla qürur duya bilərdilər.

İspaniyanın dünya çempionatındakı ən böyük qələbəsi

2022-ci il noyabrın 23-də DÇ-2022-nin qrup mərhələsində İspaniyanın 7:0 hesablı qələbəsini nümayiş etdirdiyi ustad dərsinin qurbanı Kosta-Rika olmuşdu. Luis Enrikenin komandası ilk matçında öz xarakterik pas üslubunu nümayiş etdirməklə yanaşı, qapı qarşısında nə qədər amansız ola biləcəyini göstərərək bütün potensialını ortaya qoymuşdu.

Matçda qol yağışı 11-ci dəqiqədə başlamışdı. Dani Olmo Qavi ilə "divar" oynayaraq, əla ilk toxunuşla müdafiəçini keçmiş və topu qapıçı Keylor Navasın üzərindən tora göndərmişdi. Ondan 10 dəqiqə sonra, mükəmməl orkestr rəhbəri Buskets sol cinahda Jordi Albanı tapmış və müdafiəçinin asmasını Marko Asensio qola çevirərək ispanların üstünlüyünü ikiqat artırmışdı. Alba hissənin üçüncü və son qolunda da iştirak edərək cərimə meydançasında yerə yıxılmış və Ferran Torres penalti zərbəsini dəqiq yerinə yetirmişdi.

Luis Enrikenin yetirmələri fasilədən sonra sürəti azaltsaydılar belə, kimsə onları qınamazdı, lakin onlar hücumlarına ara verməmişdilər. 54-cü dəqiqədə Torres özünün ikinci qolunu vuraraq hesabı 4:0-a çatdırmışdı. Əvvəlki qolların qurulmasında yaxından iştirak edən Qavi, nəhayət, 20 dəqiqə sonra mükəmməl bir qol (trivela) vuraraq hesabı 5:0 etmişdi. Matçın son dəqiqələrində əvəzetmədən daxil olan Karlos Soler və Alvaro Morata da fərqlənərək "Qırmızı furiya"nın dünya çempionatları tarixindəki ən böyük qələbəsini rəsmiləşdirmişdilər.

İspaniya millisi Şimali Amerikaya 2010-cu ildəki o möhtəşəm qızıl nəslin uğurunu təkrarlamaq və formalarına ikinci ulduzu tikmək üçün gəlirlər. "Qırmızı furiya" Avropa çempionluğundan sonra dünya çempionluğunu da qazanaraq dubl edə bilər?