Gürcüstanın Daxili İşlər Nazirliyinin (DİN) Miqrasiya İdarəsi son günlər həyata keçirilən tədbirlər nəticəsində azərbaycanlılar da daxil olmaqla 102 əcnəbini ölkədən deportasiya edib.

Liderxeber.az xəbər verir ki, bu barədə Gürcüstan DİN-in sosial şəbəkə hesabında açıqlama verilib.

Məlumata görə, idarə tərəfindən həyata keçirilən kompleks tədbirlər zamanı Pakistan, Türkmənistan, Özbəkistan, Hindistan, Azərbaycan, Türkiyə, Rusiya, Tailand, Filippin, Əlcəzair, Misir, İordaniya, Sudan, Livan, Nigeriya, Çin, Qazaxıstan və digər ölkələrin vətəndaşları ölkədən çıxarılıblar.

Mövcud qanunvericiliyə əsasən, deportasiya edilən şəxslərin yenidən ölkəyə girişinə qadağa qoyulub.

Son zamanlar Gürcüstanda qanunsuz miqrantlara qarşı ciddi tədbirlər görülür. Ölkə parlamenti miqrasiya qanunlarını sərtləşdirərək, deportasiya və miqrantların yoxlanılması proseslərini daha da sadələşdirib. Cari ilin əvvəlindən etibarən 2300-dən artıq xarici vətəndaş ölkədən deportasiya olunub.