Çin Xalq Respublikasının Sədri Si Cinpinin ABŞ-yə çoxdan gözlənilən rəsmi dövlət səfərinin cari ilin sentyabr ayında reallaşacağı planlaşdırılır.

Liderxeber.az xəbər verir ki, bu barədə ABŞ Dövlət katibi Marko Rubio jurnalistlərə açıqlamasında bildirib.

Dövlət katibinin sözlərinə görə, rəsmi Pekin yüksəksəviyyəli bu səfərə hazırlıq işlərini intensiv şəkildə davam etdirir. İki qlobal güc arasında gündəlikdə duran mühüm məsələləri və protokol qaydalarını razılaşdırmaq məqsədilə Çin tərəfi artıq Vaşinqtona xüsusi nümayəndə heyətləri göndərməyə başlayıb.

Rubio əlavə edib ki, ABŞ və Çin kimi iki nəhəng güc mərkəzi arasında hər zaman müəyyən ziddiyyətli məqamlar və fikir ayrılıqları yaranacaq:

"Lakin hesab edirəm ki, belə böyük və təsir gücünə malik ölkələr mütləq şəkildə dialoqu qorumalı və ikitərəfli əlaqələri davam etdirməlidirlər".

Qeyd edək ki, ABŞ Prezidenti Donald Tramp cari ilin mayın 13-15-də Çinə reallaşdırdığı rəsmi səfəri zamanı Si Cinpini payız aylarında Vaşinqtona dəvət etmişdi. Çin rəhbərliyi bu dəvəti müsbət qarşılayaraq qəbul etdiyini bəyan etmişdi. Ekspertlər payızda baş tutacaq bu görüşün xüsusilə qlobal ticarət, regional təhlükəsizlik və iqtisadi münasibətlər baxımından kritik əhəmiyyət kəsb etdiyini vurğulayırlar.