Hörmüz boğazında vurulan Qətərə məxsus tanker partlamaq təhlükəsi ilə üz-üzədir
Hörmüz boğazında hücuma məruz qaldıqdan sonra alovlanan Qətərə məxsus "Ər-Rekayyat" mayeləşdirilmiş təbii qaz (LNG) tankeri partlayış riski ilə üz-üzədir.
Liderxeber.az xəbər verir ki, bu barədə "Reuters" agentliyinin mənbəyə istinadən məlumat yayıb.
Agentliyin məlumatına əsasən, gəmi ciddi şəkildə zədələnib və heyət üzvləri ərazidən təxliyə ediliblər. Tanker boğazın Oman sahilləri boyu hərəkət edərkən sol göyərtəsindən vurulub və bundan dərhal sonra fəlakət siqnalı verib.
"Reuters" xəbər verir ki, iyulun 7-nə keçən gecə baş tutan raket hücumu nəticəsində Səudiyyə Ərəbistanına məxsus xam neft tankeri də zərər görüb. Bundan əvvəl İranın IRIB teleradio yayım korporasiyası Qətər gəmisinin ABŞ Hərbi Dəniz Qüvvələrinin dəstəyi ilə boğazdan keçməyə cəhd etdiyini bildirib. Verilən məlumata görə, tanker dəfələrlə edilən xəbərdarlıqlara məhəl qoymadığı üçün hücum hədəfinə çevrilib.
Liderxeber.az xəbər verir ki, bu barədə özəl mənbələrə istinadən IRIB dövlət teleradio şirkəti məlumat yayıb.
Bildirilib ki, sözügedən gəmi bir neçə dəfə edilən xəbərdarlıqlara məhəl qoymadığı üçün ona atəş açılıb.
Bundan əvvəl Böyük Britaniya Hərbi Dəniz Qüvvələrinin Dəniz Ticarət Əməliyyatları üzrə Koordinasiya Mərkəzi (UKMTO) Oman sahillərindən 8 kilometr şərq istiqamətində bir tankerin vurulduğunu və nəticədə yanğın başladığını açıqlamışdı. UKMTO-dan verilən xəbərdə gəmi heyətinin heç bir zərər görmədiyi vurğulanıb.
Vaşinqton İranın iyulun 6-da Hörmüz boğazında yerləşən ticarət gəmilərinə ən azı iki raket atdığını ehtimal edir.
Liderxeber.az xəbər verir ki, bu barədə ABŞ administrasiyasındakı mənbələrə istinadən "Axios" portalı məlumat yayıb.
Nəşrin məlumatına əsasən, hücumlar Hörmüz boğazında zərbələrin dayandırılmasını nəzərdə tutan ABŞ və İran arasındakı bir həftəlik razılaşmanın müddəti bitdikdən sonra həyata keçirilib. Bildirilib ki, bu hadisə Vaşinqtonla Tehran arasındakı anlaşma memorandumunu təhlükə altına salır. Portal qeyd edir ki, ABŞ-nin İrandakı hədəflərə zərbələr endirərək cavab verməsi ehtimal olunur.
Xatırladaq ki, fevralın 28-də ABŞ və İsrail İranla müharibəyə başlayıb. İyun ayında isə Vaşinqton və Tehran bütün cəbhələrdə, o cümlədən Livanda hərbi əməliyyatların dərhal dayandırılmasını özündə əks etdirən anlaşma memorandumu imzalayıblar. Daha sonra İsveçrənin Bürgenstok kurortunda Doha və İslamabadın vasitəçiliyi ilə ABŞ və İran arasında memorandumun icrasına dair danışıqlar aparılıb. Birinci raundun yekunlarına dair Pakistan və Qətərin birgə bəyanatında vurğulanıb ki, İran və ABŞ nümayəndələrinin iştirakı ilə keçirilən görüş müsbət və konstruktiv şəraitdə baş tutub, ümidverici irəliləyiş əldə olunub və gələcək texniki məsləhətləşmələrin aparılması üçün müvafiq zəmin yaradılıb.
