ABŞ-li alimlər müəyyən ediblər ki, uzunömürlü insanların övladları daha sağlam qidalanma rejiminə meyllidirlər və bu vərdiş yaşla bağlı bir sıra xəstəliklərin riskini əhəmiyyətli dərəcədə azaldır.

Liderxeber.az xəbər verir ki, tədqiqatın nəticələri "Advanced Science" jurnalında dərc olunub.

Tədqiqatçılar bu nəticəyə uzunmüddətli müşahidələrin yekunlarına əsasən gəliblər. Araşdırma 100 yaş və daha çox yaşayan insanların ən yaxın qohumlarını əhatə edib və 20 il davam edib. İştirakçıların bir çoxunun tədqiqatın əvvəlində artıq 70 yaşı var idi. Müşahidələr nəticəsində məlum olub ki, bu qrupda insult, demensiya, II tip diabet və ürək-damar xəstəliklərinə daha az rast gəlinir.

Alimlər bu nəticələri təkcə genetika ilə deyil, həm də həyat tərzi ilə əlaqələndirirlər:

"Uzunömürlülərin övladları maddələr mübadiləsi, ürək-damar və sinir sistemləri üçün faydalı olan qidalanma rejiminə daha çox riayət edirlər. Onlar daha çox balıq, tərəvəz və meyvə istehlak edir, şəkər və duz qəbulunu isə məhdudlaşdırırlar. Belə qidalanma vərdişləri orqanizmin xəstəliklərə qarşı anadangəlmə müqavimətini gücləndirir və "yaxşı genlərin" potensialını reallaşdırmağa kömək edir".

Elm adamları vurğulayırlar ki, sağlam qidalanma insanın özünün idarə edə biləcəyi ən vacib amillərdən biridir. Balanslaşdırılmış qidalanma rejimi təkcə ömrü uzatmaqla qalmır, həm də insanın yaşlılıq dövründə xroniki xəstəliklərlə keçirdiyi illərin sayını azaltmağa imkan verir.