İranda vurulan ABŞ qırıcı təyyarəsinin ikinci ekipaj üzvünün axtarışı davam edir.

Liderxeber.az xəbər verir ki, bu barədə "Associated Press" məlumat yayıb. Bildirilib ki, Nümayəndələr Palatasının Silahlı Qüvvələr Komitəsi Pentaqondan pilotun vəziyyəti ilə bağlı "naməlum" bildirişi alıb. Agentliyin Pentaqondan əldə etdiyi məlumatda Yaxın Şərqdə təyyarənin vurulduğu bildirilsə də, onun növü və dəqiq harada atəşə tutulduğu dəqiqləşdirilməyib.

Qeyd edək ki, aprelin 3-də İranın hava hücumundan müdafiə qüvvələri ölkənin hava məkanında ABŞ-yə məxsus bir qırıcı təyyarəni vurub. İslam İnqilabı Keşikçiləri Korpusu (SEPAH) sözügedən təyyarənin "F-35" (təknəfərlik təyyarə) olduğunu bildirib. CNN və "Axios" isə İran mediası tərəfindən dərc edilən fotoşəkilləri araşdırdıqdan sonra qırıcının iki nəfərlik "F-15 Strike Eagle" bombardmançı təyyarəsi olduğu qənaətinə gəliblər. Bildirilib ki, iki pilotdan biri tapılıb və təxliyə edilib.

İran mediası da ikinci ABŞ pilotunu tapan vətəndaşa mükafat veriləcəyi barədə məlumat yayıb.

ABŞ Prezidenti Donald Tramp isə axtarış və xilasetmə işlərini müzakirə etməkdən imtina edib, lakin hadisənin İranla danışıqlara təsir etməyəcəyini bildirib.