Ağ Ev Qəzzada atəşkəs prosesinin ikinci mərhələsinin əsas elementi kimi yaradılan “Sülh Komitəsi”nin üzvlərini, eləcə də, keçid dövrünü idarə edəcək Qəzza Milli İdarəetmə Komitəsinin rəhbərini açıqlayıb.

Liderxeber.az xəbər verir ki, Ağ Evin bəyanatında ABŞ Prezidenti Donald Trampın Qəzza üçün təqdim etdiyi 20 maddəlik sülh planına istinad olunaraq, prosesin ikinci mərhələsinin rəsmi şəkildə başladığı vurğulanıb.

Bəyanata əsasən, ikinci mərhələnin əsas dayaqlarından biri olan Qəzza Milli İdarəetmə Komitəsinə Fələstin Muxtariyyətinin planlaşdırma üzrə keçmiş nazir müavini Dr. Əli Şaat sədrlik edəcək.

Ağ Ev Dr. Şaatın dövlət xidmətlərinin bərpası, vətəndaş institutlarının yenidən qurulması və Qəzzada gündəlik həyatın sabitləşdirilməsi istiqamətində fəaliyyət göstərəcəyini, eyni zamanda, uzunmüddətli idarəetmə mexanizmlərinin formalaşdırılmasına rəhbərlik edəcəyini bildirib.

Prezident Trampın sədrlik etdiyi və “Təsisçi İcra Şurası” kimi təqdim olunan Sülh Şurasının üzvləri də elan edilib. Şuraya ABŞ Dövlət Katibi Marko Rubio, Trampın xüsusi nümayəndəsi Stiv Uitkoff, Trampın kürəkəni və keçmiş baş müşaviri Cared Kuşner, Böyük Britaniyanın keçmiş baş naziri Toni Bleyer, eləcə də, Mark Rouan, Ajay Banqa və Robert Qabriel daxildir.

Ağ Evin məlumatına görə, Qəzzada idarəetmə və xidmət sahələrində bütün fəaliyyətləri koordinasiya etmək məqsədilə “Qəzza İcra Komitəsi” yaradılıb. Komitənin üzvləri sırasında xarici işlər naziri Hakan Fidan, Stiv Uitkoff, Cared Kuşner, Toni Bleyer, BƏƏ-nin beynəlxalq əməkdaşlıq naziri Rim Əl-Haşimi, Qətərli diplomat Əli Əl-Təvadi, Misir kəşfiyyatının rəhbəri Həsən Rəşad, Mark Rouan, Nikolay Mladenov, Yakir Qabay və Siqrid Kaaq yer alır.

BMT-nin Yaxın Şərq üzrə keçmiş xüsusi elçisi Nikolay Mladenov Qəzza üzrə Ali Nümayəndə vəzifəsini icra edəcək. O, Sülh Komitəsi ilə Qəzza Milli İdarəetmə Komitəsi arasında yerində koordinasiyanı təmin edəcək, mülki və təhlükəsizlik strukturları arasında əlaqələndirmə aparacaq və Qəzzanın idarə olunması, yenidən qurulması və inkişafı proseslərində Sülh Komitəsinə dəstək göstərəcək.

Ağ Evin açıqlamasına əsasən, general-mayor Kasper Ceffers isə Beynəlxalq Sabitləşdirmə Qüvvələrinin komandanı təyin olunub.