Suriya Müdafiə Nazirliyi yanvarın 9-na keçən gecə hökumət qüvvələri ilə Suriya Demokratik Qüvvələri (SDQ) arasında toqquşmaların baş verdiyi Hələbdə atəşkəs elan edib.

Liderxeber.az xəbər verir ki, bu barədə Suriya ordusundan məlumat verilib.

"Yaşayış məntəqələrində yeni eskalasiyanın qarşısını almaq üçün Müdafiə Nazirliyi Hələb şəhərinin Şeyx Maksud, Əşrəfiyyə və Bəni Zeyd rayonları yaxınlığında saat 03:00-dan (Bakı vaxtı ilə 04:00 - red.) etibarən atəşkəs elan edir", - deyə açıqlamada bildirilib.

Qeyd olunur ki, SDQ-yə təyin olunmuş əraziləri tərk etmək üçün cümə günü səhər saat 9-a qədər vaxt verilib.

Bu həftə Hələbdə Suriya hökumət qüvvələri ilə SDQ arasında yenidən toqquşmalar baş verib.

Daha əvvəl Suriya İnformasiya Nazirliyi Hələbdə məhdud hərbi əməliyyatın başlandığı barədə məlumat yaymışdı.

Bildirilib ki, son aylarda SDQ-nin hücumları nəticəsində 25 hərbçi və 20-dən çox mülki şəxs həlak olub.

SDQ isə öz növbəsində hökumət qüvvələrini Şeyx Maksud və Əşrəfiyyə rayonlarında ağır silahlardan istifadə etməklə hücuma keçməkdə ittiham edib.