İtaliyanın qənnadı məmulatları istehsalçısı "Ferrero"nun Şimali Amerika bölməsi gələn ilin ən böyük idman hadisələri - "Superboul" və futbol üzrə dünya çempionatı zamanı öz məhsulunun reklamına 100 milyon dollardan çox büdcə ayıracaq.

Liderxeber.az xəbər verir ki, bu barədə məlumatı Interfax.ru yayıb.

"Ferrero"nun Şimali Amerika bölməsinin başçısı Maykl Linsi deyib:

"İdman yarışları əvvəlki kimi ən böyük auditoriya toplayır. Biz istehlakçılara televizor qarşısında oturarkən yedikləri məhsulları reklam edəcəyik. Tamaşaçılar "Superboul"a reklam naminə baxırlar ki, bu da zəmanəmizdə unikal haldır. Belə ki, istehlakçılar adətən reklam fasilələri zamanı ya reklamı dayandırır, ya da teleekrandan uzaqlaşırlar".

"Ferrero" "Superboul"da - Amerika futbolu üzrə çempionatın finalında ilk dəfə öz reklamını təqdim edəcək. Çempionatın final mərhələsi fevralda keçiriləcək.

Ötən matç teleauditoriyaya 127.7 milyon tamaşaçı toplamışdı. 30 saniyəlik reklam çarxının qiyməti qeyri-rəsmi məlumata görə 8 milyon dollardır. Matçı gələn il yayımlayacaq "NBCUniversal" sentyabrın əvvəlində bildirib ki, artıq bütün reklam slotları satılıb.

"Ferrero" 1946-cı ildə İtaliyada yaradılıb. Şirkət "Nutella", "Kinder Surprise", "Kinder Chocolate", "Raffaello", "Ferrero Rocher" brendi ilə şokolad və konfetlər istehsal edərək dünyanın 170-dən çox ölkəsinə satır.