Yəmənin "Ənsar Allah" hərəkatından olan husilər son 24 saat ərzində Qırmızı dənizdə ABŞ gəmilərinə və "USS Harry Truman" aviadaşıyıcısına üç dəfə hücum ediblər.

Liderxeber.az-ın məlumatına görə, bu barədə üsyançıların formalaşdırdığı silahlı qüvvələrin nümayəndəsi Yəhya Saria özünün "Telegram" kanalında bəyan edib.

"Silahlı qüvvələrimizin hərbi-dəniz, raket və pilotsuz qüvvələri Qırmızı dənizdə ABŞ-nin "USS Harry Truman" aviasiya daşıyıcısı başda olmaqla düşmən hərbi gəmilərinə qanadlı raketlər və PUA-larla bir neçə zərbə endirib. Bu, son 24 saat ərzində üçüncü toqquşmadır", - deyə hərəkat nümayəndəsi bildirib.

Xatırladaq ki, martın 15-də ABŞ Prezidenti Donald Tramp Yəmən ərazisinin təxminən 1/3-ni nəzarətdə saxlayan üsyançılara qarşı hərbi əməliyyatın başlanmasını elan edib. O bu qərarı husilərin Qırmızı dəniz və Ədən körfəzində ticarət gəmilərinə hücumları ilə izah edib. Əməliyyatda Qırmızı dənizdə yerləşən "USS Harry Truman" aviadaşıyıcı qrupu iştirak edir. Bu qrup mütəmadi olaraq "Ənsar Allah" hərəkatının nəzarətində olan Yəmən ərazisinə zərbələr endirir.