Xörək duzu insan orqanizmi üçün həyati əhəmiyyət daşıyan mineraldır.

O, maddələr mübadiləsi proseslərində, həmçinin sinir sisteminin, əzələlərin fəaliyyətində və orqanizmdə su balansının tənzimlənməsində mühüm rol oynayır.

Liderxeber.az xəbər verir ki, bu barədə "T-online" portalında dərc olunan materialda məlumat verilib.

Həkimlər qeyd edirlər ki, duz orqanizm üçün gündəlik tələbat olsa da, onun istehlakı mütləq norma daxilində qalmalıdır. Yetkin bir insanın gündəlik minimum tələbatı təxminən 1.4 qramdır. Tövsiyə olunan yuxarı hədd isə sutkada 3.8-6 qram (təxminən bir çay qaşığı) aralığında dəyişir.

Tövsiyələrə baxmayaraq, bir çox insan normadan xeyli artıq duz istehlak edir. Mütəxəssislər əhalinin, xüsusən də uşaqlar və yeniyetmələrin bu normanı mütəmadi olaraq aşdığını vurğulayırlar.

Ümumdünya Səhiyyə Təşkilatının (ÜST) ekspertləri də duzdan həddindən artıq istifadənin sağlamlıq üçün ciddi risklər yaratdığı barədə xəbərdarlıq edirlər. Təşkilatın məlumatına görə, duzun normadan çox qəbulu arterial təzyiqin yüksəlməsinə və ürək-damar xəstəliklərinin inkişafına səbəb ola bilər. Bundan əlavə, duz normadan artıq olduqda böyrəklərə əlavə yük düşür, bağırsaq mikroflorası pozulur və maddələr mübadiləsində problemlər yaranır. Bəzi tədqiqatlar, həmçinin yüksək duz istehlakı ilə mədə xəstəlikləri arasında əlaqə olduğunu göstərir.

Mütəxəssislər xatırladırlar ki, duz təkcə xörəklərə əlavə etdiyimiz şəkildə deyil, həm də bir çox hazır qida məhsullarının tərkibində mövcuddur. Buna görə də sağlamlıq üçün qidalanma rasionunu nəzarətdə saxlamaq xəstəliklərin profilaktikasında əsas şərtdir.