Alkoqolun orqanizmdən tamamilə xaric olması üçün nə qədər vaxt tələb olunur?

Liderxeber.az-ın xəbərinə görə, bu barədə rusiyalı psixiatr və narkoloq Ruslan İsayev Gazeta.ru-ya müsahibəsində danışıb.

Onun sözlərinə görə, alkoqolun bədəndən xaric olması mürəkkəb bir prosesdir və buna cins, yaş, çəki, fərdi metabolik xüsusiyyətlər, xroniki xəstəliklərin olması, alkoqol istehlakının tezliyi və həcmi kimi bir çox amillər təsir edir.

"Ona görə də hər kəsi əhatə edən birmənalı cavab vermək mümkün deyil. Lakin bu prosesin əsas mərhələlərini nəzərdən keçirmək olar. Alkoqol orqanizmə daxil olduqdan sonra onun metabolizm prosesi başlayır. Etanolun təxminən 90%-i qaraciyərdə alkoqoldehidrogenaz və asetaldehiddehidrogenaz fermentlərinin iştirakı ilə emal olunur. Orta hesabla, sağlam yetkin insanın qaraciyəri bir saatda təxminən 7-10 qram təmiz spirti emal edə bilir. Bu o deməkdir ki, məsələn, bir şüşə araq (tərkibində 200 qram etanol olan 500 ml) 100 kq çəkisi olan kişinin bədənindən təxminən 20 saat ərzində tamamilə xaric olur", - deyə həkim bildirib.

Nəzərə almaq vacibdir ki, qanda alkoqolun birbaşa ölçülməsi (promil) ümumi mənzərənin sadəcə bir hissəsidir. Etanolun əsas parçalanma məhsulları olan asetaldehid və sirkə turşusu bədənə toksik təsir göstərir, sərxoşluqdan sonrakı sindroma və daxili orqanların potensial zədələnməsinə səbəb olur. Bu maddələr toxumalarda, xüsusən də yağ toxumasında toplanır və orqanizmdə daha uzun müddət qala bilir.

"Əgər alkoqol istehlakı epizodik olaraq baş verirsə, etanol metabolitləri bir neçə gün ərzində bədəni tamamilə tərk edir. Ancaq alkoqolun müntəzəm istehlakı halında metabolik məhsulların qalıqları toxumalarda üç həftəyə qədər qala bilər. Bu, həddindən artıq alkoqol qəbul edən insanın hətta uzun müddət spirtdən uzaq qaldıqdan sonra belə analizlərində metabolitlərin izlərinin aşkar oluna biləcəyi fenomeni izah edir.

Həmçinin nəzərə almaq lazımdır ki, söhbət yalnız spirtin və onun parçalanma məhsullarının xaric edilməsindən gedir. Orqanizmin, xüsusən də qaraciyərin, beyinin və ürək-damar sisteminin normal fəaliyyətinin bərpası daha çox vaxt aparır və bu, insanın ümumi sağlamlıq vəziyyətindən asılıdır", - deyə Ruslan İsayev qeyd edib.