Azərbaycanın sədrliyi humanitar minatəmizləməni Asiyada Qarşılıqlı Fəaliyyət və Etimad Tədbirləri üzrə Müşavirə (AQEM) çərçivəsində yeni etimad tədbiri kimi təklif edir.

Bunu müsahibəsində AQEM-in Baş katibi Kayrat Sarıbay deyib.

Onun sözlərinə görə, bu məsələdə əsas diqqət minalardan çirklənmə ilə üzləşən bir çox Asiya ölkələri üçün bu çağırışın aktuallığını nəzərə alaraq qabaqcıl təcrübə mübadiləsinə yönəldiləcək.

“Humanitar və sosial proqramlara töhfə AQEM-in bütün üzv dövlətlərinin mühüm prioritetidir. Azərbaycan təşkilata sədrlik edən ölkə kimi AQEM-i sülhün, sabitliyin möhkəmləndirilməsi və həyat keyfiyyətinin yüksəldilməsi üçün səmərəli platforma hesab edir”, baş katib bildirib.

O, Azərbaycanın sədrliyi altında üzv dövlətlərin bu sahələrdə dialoqu dərinləşdirəcəyinə və razılaşdırılmış addımlar atacağına əminliyini ifadə edib: “Bu təşəbbüslər praktiki fayda verəcək, qarşılıqlı anlaşmanı, mədəniyyətlərə hörmət münasibətini möhkəmləndirəcək və ölkələrimizdə əhalinin rifahının yüksəldilməsi üçün yeni imkanlar yaradacaq”.

“Azərbaycanın sədrliyi iki əhəmiyyətli transformasiya ilə xarakterizə olunan yeni dövrün başlanğıcını təmsil edir: AQEM-in tam beynəlxalq təşkilata çevrilməsi prosesi və geosiyasi, eləcə də iqtisadi kontekstdə dərin dəyişikliklər. Bu prosesdə qlobal artım, innovasiya və siyasi təsir mərkəzi kimi özünü daha çox təsdiqləyən Asiyanın qarşılıqlı əlaqəsi xüsusi əhəmiyyət kəsb edir”, - K.Sarıbay əlavə edib.

Müsahibənin tam mətni ilə buradan tanış ola bilərsiniz.