Azərbaycanın İrandakı səfiri Əli Əlizadə ISNA agentliyinə müsahibəsində iki ölkə arasında yüksək səviyyəli səfərlərin yaxın gələcəkdə davam etdiriləcəyini açıqlayıb.

Bu barədə "Azad İran" "Telegram" kanalı məlumat yayıb.

Səfir bildirib ki, İran və Azərbaycan arasında əlaqələrin inkişafı istiqamətində mühüm addımlar atılacaq.

Xankəndi şəhərində keçirilən İslam Əməkdaşlıq Təşkilatının (İƏT) Zirvə toplantısına toxunan Əli Əlizadə deyib ki, İran Prezidenti Məsud Pezeşkian da sammitdə iştirak edib.

Onun sözlərinə görə, Zirvə toplantısının nəticələri çox uğurlu olub və dövlət başçıları arasında iqtisadiyyat, ticarət, enerji, mədəniyyət sahələrində əməkdaşlığın sürətləndirilməsinə dair sərəncamlar imzalanıb.

Azərbaycan səfiri İƏT-ə üzv ölkələr arasında əlaqələrin daha da inkişaf etdirilməsinə dair Azərbaycanın səylərinin davam edəcəyini diqqətə çatdıraraq, ticarət dövriyyəsinin ildən-ilə artdığını və bu əlaqələrin daha da möhkəmlənəcəyini vurğulayıb.

İki ölkə arasında qardaşlıq və dostluq əlaqələri olduğunu deyən diplomat Pezeşkianın indiyədək Azərbaycana iki uğurlu səfərinin həyata keçirildiyini xatırladıb. O, yaxın gələcəkdə yüksək səviyyəli görüşlər və fikir mübadiləsinin davam etdiriləcəyini qeyd edib.

Səfir bu səfərlərin məqsədinin tərəflər arasında əməkdaşlığı daha da möhkəmləndirmək və ikitərəfli əlaqələri inkişaf etdirmək olduğunu vurğulayıb.