“Peyvəndlər bəşəriyyətin ən mühüm ixtiralarından biridir. Peyvəndlər sahəsində təbii çiçək xəstəliyi yer üzündən ləğv olunub. Növbədə ləğv edilməli xəstəlik poliomielit xəstəliyidir”.

Liderxeber.az xəbər verir ki, bunu Ümumdünya Səhiyyə Təşkilatının Azərbaycandakı Nümayəndəliyinin məsləhətçisi Şahnaz Həsənova media nümayəndələri ilə görüşdə deyib.

O bildirib ki, 30-dan çox təhlükəli xəstəliyə qarşı peyvənd mövcuddur: “Həmçinin iki xərçəng növünə qarşı peyvənd mövcuddur. Bunlar qaraciyər xərçəngi və uşaqlıq boynu xərçəngi ilə bağlı peyvəndlərdir.

Qeyd edim ki, 2020-2030-cu illər üçün 98 ölkədə 10 patogenə qarşı immunizasiya proqramının 32 milyon həyatı xilas edəcəyi proqnozlaşdırılıb. Onların 88%-ni 5 yaşa qədər uşaqlar təşkil edəcək. Həmçinin bildirməliyəm ki, dünyada immunizasiya sayəsində difteriya, tetanus, göyöskürək, qrip və qızılca kimi xəstəliklərdən hər il 5 milyona qədər ölümün qarşısı alınır. Peyvəndlər çox təhlükəsiz və effektivdir. Bir neçə peyvəndi eyni gündə vurmaq olar”.

***

ÜST-nin Azərbaycandakı nümayəndəsi və Ölkə Ofisinin rəhbəri Hande Harmancı isə bildirib: “İki xərçəng növünün vaksini var. Bunlardan biri olan uşaq boynu xərçəngi ilə bağlı HPV vaksini dünyada insanları xərçəngdən qoruyur. Qaraciyər xərçəngi vaksini artıq Azərbaycanda var. HPV ilə bağlı bir ildir Azərbaycanda Səhiyyə Nazirliyi ilə müzakirələr aparılır”.

Onun sözlərinə görə, hansı ölkəyə hansı vaksinin gəlməsini ölkənin Səhiyyə Nazirliyi müəyyən edir: “Azərbaycanda HPV vaksininin olub-olmayacağını deyə bilmərəm. Biz bununla bağlı sorğu keçiririk, insanların düşüncələrini öyrənirik. Bu, çox önəmli vaksindir. Güman edirəm ki, bir neçə il ərzində Azərbaycan dövlət proqramına salına bilər. Artıq Avropada 50 ölkədə istifadə olunur”.