ABŞ-nin Ədliyyə Nazirliyi Kanadanın “Bombardier” şirkəti ilə bağlı həyata keçirilən korrupsiya istintaqına xitam verib. Sözügedən istintaq çərçivəsində Azərbaycanın keçmiş nəqliyyat naziri Ziya Məmmədov, onun müavini, “Azərbaycan Dəmir Yolları” QSC-nin keçmiş rəhbəri Arif Əsgərovun da adları hallanırdı.

Liderxeber.az  xəbər verir ki, Kanada mediası şirkətin aprelin 1-də məsələ ilə bağlı nazirlikdən rəsmi bildiriş aldığını yazıb. Eyni zamanda, şirkət özü də belə bir məktub aldığını təsdiqləyib. 

“ABŞ-nin Ədliyyə Nazirliyi bildirib ki, əldə olunmuş bütün məlumatları nəzərdən keçirdikdən sonra İndoneziya və Azərbaycanın dəmir yolları ilə bağlı müqavilələrlə əlaqəli hər iki araşdırmanı dayandırır”, - deyə “Bombardier” şirkətinin ən sonuncu maliyyə hesabatında qeyd olunub. 

Məlumata görə, ABŞ Ədliyyə Nazirliyi həmin qərarı şərh etməkdən imtina edib. 

Qeyd edilib ki, “Bombardier” şirkəti ilə Azərbaycan arasında bağlanan müqaviləyə dair araşdırma 2020, İndoneziyanın “Garuda Airlines” aviaşirkətinin təyyarələrinin satışı ilə bağlı istintaq isə 2021-ci ildə başladılıb. Şirkət də həmçinin əlavə şərh verməyib. 

Xatırladaq ki, 2013-cü ildə Azərbaycanın Nəqliyyat Nazirliyi ilə Kanada şirkəti arasında Azərbaycan dəmir yollarının Bakı-Qazax-Böyük Kəsik hissəsində siqnal avadanlıqlarının quraşdırılmasına dair müqavilə bağlanıb. Layihənin icraçısı olaraq şirkətin İsveçdəki törəmə şirkəti “Bombardier Transportation” çıxış edib. Layihənin ümumi dəyəri isə 350 milyon dollar təşkil edib. Araşdırma müəyyən edib ki, bu məbləğin təqribən 100 milyon dolları ofşor şirkətlər vasitəsilə Nəqliyyat Nazirliyinin yüksəkvəzifəli məmurlarına mənfəət kimi geri qaytarılıb.

Həmin dövrdə Nəqliyyat Nazirliyinə Ziya Məmmədov, nazirliyin strukturuna daxil olan Azərbaycan Dəmir Yollarına” isə Arif Əsgərov rəhbərlik edirdi.