Sumqayıtda, “Sevgilim” şadlıq sarayında Paşalı Rayon İstisu İcmasının təşkilatçılığı ilə “Qərbi Azərbaycana – Dərələyəzə (İstisuya) qayıdış” adlı möhtəşəm tədbir keçirildi.

Liderxeber.az xəbər verir ki, tədbir Qərbi Azərbaycandan deportasiya olunmuş soydaşlarımızın birliyini gücləndirmək, tarixi yaddaşı qorumaq və qayıdış ideyasına mənəvi dəstək vermək məqsədilə təşkil edilmişdi.

Tədbir iştirakçıları əvvəlcə “İstisu xatirələrdə” adlı sərgi ilə tanış oldular. Burada İstisu bölgəsinin zəngin tarixi, deportasiya olunmuş soydaşlarımızın keçmişini əks etdirən nadir fotolar, arxiv sənədləri və xatirə əşyaları nümayiş olundu.

Tədbirin aparıcısı Həsən Əhmədov qonaqları salamladıqdan sonra Azərbaycan Respublikasının Dövlət Himni səsləndirildi və şəhidlərimizin əziz xatirəsi bir dəqiqəlik sükutla yad edildi. Daha sonra İstisu İcmasının sədri Alı Safolu (Alıyev) çıxış edərək Qərbi Azərbaycanın tarixindən, İcmanın fəaliyyətindən və soydaşlarımızın birliyinin gücləndirilməsinin əhəmiyyətindən danışdı. O, Qərbi Azərbaycan İcmasının sədri, millət vəkili Əziz Ələkbərliyə və Paşalı Rayon İcmasının sədri Faiq Xudayevə göstərdikləri dəstəyə görə minnətdarlıq etdi.

İlk çıxış edən İstisu İcmasının ağsaqqalı Yusif müəllim Qərbi Azərbaycan məsələsinin milli kimliyimiz üçün həyati əhəmiyyətini vurğuladı. Daha sonra Paşalı Rayon İcmasının sədri Faiq Xudayev diaspor təşkilatlarının qayıdış ideyasının reallaşmasında aktiv iştirakının vacibliyini qeyd etdi. O, İstisu İcmasında fərqlənən şəxslərə təşəkkürnamlər təqdim olundu. 

Keşkənd İcmasının sədr müavini Məhəmməd Rəsuloğlu, Gomur kənd İcmasının sədri Bəxtiyar Həsənov, Herher İcmasının sədri Afaq Sadıqova, Arınc İcmasının sədri Nigar Həsənova və eyni zamanda "Dərələyəz" qəzetinin redaktoru Raqub Kamal geniş çıxış edərək qayıdışımızın reallaşması istiqamətində daha da mübariz olmağın vacibliyini diqqətə çatdırdılar.Daha sonra çıxış edən Qərbi Azərbaycan İcmasının Sumqayıt şəhər nümayəndəliyinin sədri Ramiz İsmayılov, İstisu İcmasının sədr müavini Şamil Alıyev və digər ictimai xadimlər İstisu İcmasının gördüyü işlərin mühüm əhəmiyyətini vurğuladılar.

Beynəlxalq Diaspor Mərkəzinin sədri İsmayıl Ağayev çıxış edərək İstisu İcmasının təşkilatçılıq bacarığını yüksək qiymətləndirdi və onların Qərbi Azərbaycan hərəkatının öncüllərindən olduğunu vurğuladı. O, Terp kənd icmasının sədri Ceyhunə Şirəliyevanın fəaliyyətini də xüsusi qeyd etdi. Sonda İsmayıl Ağayev İstisu İcmasının sədri Alı Alıyevə Beynəlxalq Diaspor Mərkəzinin adından təşəkkürnamə və plaket təqdim etdi.

Tədbir çərçivəsində Beynəlxalq Diaspora Mərkəzinin Avropa nümayəndəliyinin rəhbəri, professor Azər Kərimovun təbrik mesajı səsləndirildi. 

İstisu İcması tərəfindən şəhid valideynlərinə və icmanın fəal üzvlərinə təşəkkürnamələr və mükafatlar təqdim olundu.

Tədbir xalq musiqiləri və milli rəqslərlə davam etdi, iştirakçılar üçün təşkil olunan musiqi proqramı mərasimin xüsusi bir ruhda yekunlaşmasına şərait yaratdı. Sonda xatirə şəkilləri çəkildi və bu tarixi gün yaddaşlara həkk olundu.

Beləliklə, “Qərbi Azərbaycana – Dərələyəzə (İstisuya) qayıdış” adlı tədbir həm tarixi məqamların vurğulandığı, həm də gələcəyə ümid dolu baxışın sərgiləndiyi bir toplantı kimi yadda qaldı.