Kənd Təsərrüfatı Nazirliyi Torpaq Məcəlləsinə edilmiş dəyişikliklərin hüquqi və texniki aspektlərini müəyyən edən alt normativ aktlar (reqlament) hazırlayır.

Bunu Liderxeber.az-a açıqlamasında nazirliyin Torpaqdan istifadəyə nəzarət şöbəsinin müdiri Firudin Tağıyev bildirib.

O qeyd edib ki, bu reqlamentlər çərçivəsində kənd təsərrüfatı təyinatlı torpaq sahələrində infrastruktur standartlarının tətbiqi tənzimlənəcək: “Dövlət Şəhərsalma və Arxitektura Komitəsi həmin rəylər əsasında tikinti icazələri verəcək”.

F. Tağıyevin sözlərinə görə, Torpaq Məcəlləsində edilmiş son dəyişikliklərlə aqrar sahədə fəaliyyət göstərən sahibkarlar və investorlar üçün əhəmiyyətli yeniliklər gətirib: "Azərbaycanda kənd təsərrüfatı məhsullarının istehsalı və emalı üçün nəzərdə tutulmuş tikililər, habelə işçilər üçün yaşayış təyinatlı əsaslı tikililər sahəsi 5 hektardan az olmayan ərazidə inşa edilə bilər. Qüvvəyə minmiş dəyişikliklərə əsasən, bu tikililər həmçinin vahid sərhəd daxilində yerləşən aqrar təyinatlı torpaq sahələrinin (yay və qış otlaqları, ümumi istifadədə örüş sahələri istisna olmaqla) 1 %-dən artıq olmayan hissəsində inşa edilə və quraşdırıla bilər. Buna icazə torpaq sahəsinin mülkiyyətçisinin (onun yazılı razılığı ilə istifadəçisinin və ya icarəçisinin) müraciəti əsasında Şəhərsalma və Tikinti Məcəlləsinə uyğun verilir. Bu məqsədlər üçün torpaq sahəsinin kateqoriyasının və məqsədli təyinatının dəyişdirilməsi tələb olunmur. Dəyişikliklərin əsas məqsədlərindən biri də 5 hektar məhdudiyyətinin tətbiqi vasitəsilə kiçik ölçülü kənd təsərrüfatı torpaqlarının birləşdirilməsini təşviq etməkdir. Beləliklə, fərdi olaraq bu imtiyazlardan yararlana bilməyən torpaq sahibləri birləşərək, 5 hektar və daha böyük torpaq sahələri yaratmaqla qeyd edilən güzəştlərdən və imkanlardan faydalana biləcəklər".

O bildirib ki, dəyişikliklər bir çox vacib nüansları özündə əks etdirir: “Aqrar sektor üzrə investisiya yatıran sahibkarlar uzun və mürəkkəb prosedurlar səbəbindən torpaq sahələrinin təyinatının dəyişdirilməsi ilə bağlı çətinliklərlə üzləşirdi. Bu, bəzi investisiya layihələrinin ya təxirə salınmasına, ya da tamamilə dayandırılmasına səbəb olurdu. Yeni tənzimləmələr kənd təsərrüfatının inkişafına mane olan bu halların qarşısını almaq məqsədi daşıyır".