Sizin reklam burada
Sumqayıt Tibb Mərkəzi məişət zorakılığı ilə mübarizə çərçivəsində maarifləndirici tədbirləri davam etdirir
Sumqayıt Tibb Mərkəzi (STM) məişət zorakılığı ilə mübarizə çərçivəsində maarifləndirici tədbirləri davam etdirir.
Liderxeber.az xəbər verir ki, növbəti belə tədbir STM-nin 7 nömrəli Ailə Sağlamlıq Mərkəzinin (ASM) təşkilatçılığı ilə dislokasiya ərazisində yaşayan bir qrup Hacı Zeynalabdin qəsəbəsi sakininin iştirakı ilə keçirilib.
"Məişət zorakılığının uşaqlara təsiri və zorakılığın acı nəticələri" mövzusunda təşkil olunan tədbirdə 7 nömrəli ASM-nin baş həkimi Vüsalə Cavadzadə çıxış edərək bu tip maarifləndirici tədbirlərin əhəmiyyətindən danışıb.
ASM-nin ailə həkimi-pediatr Səadət Soltanova "Ailədaxili zorakılığın uşaqların sağlamlığına mənfi təsirləri” mövzusundan geniş bəhs edib və bununla bağlı aparılan mübarizə tədbirlərinin vacibliyini vurğulayıb.
Azərbaycan Respublikası Vəkillər Kollegiyasının üzvü, vəkil Rəşad İldırımzadə isə "Məişət zorakılığının hüquqi aspektləri” mövzusu ilə bağlı çıxış edib. R. İldırımzadə məişət zorakılığı və onun növləri, zorakılıq törətmiş şəxslərin Azərbaycan qanunvericiliyi ilə nəzərdə tutulmuş qaydada məsuliyyət daşıdığını iştirakçıların diqqətinə çatdırıb.
Psixoterapevt Dürdanə Məmmədova "Məişət zorakılığının uşaqların psixikasına mənfi təsirləri və onun reabilitasiyası” mövzusundan geniş bəhs edib. Qeyd edib ki, məişət zorakılığının cəmiyyət üçün ən ağır fəsadlarından biri də psixoloji travma almış uşaqlardır. O, belə uşaqların cəmiyyətdə şəxsiyyət kimi formalaşmasında reabilitasiyanın önəmli faktor olduğunu bildirib.
Sonda tədbir iştirakçılarını maraqlandıran suallar cavablandırılıb və mövzu ilə bağlı hazırlanmış bukletlər paylanıb.
