Bəzən mağazalarda müştərilər vitrindəki məhsullara təsadüfən, yəni istəmədən zərər verə bilərlər. Belə vəziyyətlər müştəri ilə mağaza rəhbərliyi arasında anlaşılmazlıq yaradır.

Liderxeber.az-ın "Qanun nə deyir?" adlı rubrikasının bugünkü mövzusu vitrindəki məhsullara zərər verilməsinə görə haqqın ödənilməsi ilə bağlıdır.

Əgər hadisə istəmədən baş veribsə, buradakı ziyanı sahibkar, yəni mağazanın sahibi ödəyir. Mülki Məcəllənin 152.10-cu maddəsində qeyd olunur ki, əmlakın təsadüfən məhv olması və ya təsadüfən zədələnməsi riski mülkiyyətçinin (satıcının) üzərinə düşür.

Yəni mağazada məhsulun təsadüfən sındırılmasına və ya zədələnməsinə görə məsuliyyət daşımırsınız. Bu halda sizdən məhsulun ödənişi tələb oluna bilməz.

Təsadüfi hallara alıcının hərəkətləri ilə əlaqəli olmayan, digər səbəblərdən yaranan ziyanlar aid edilir. Məsələn, məhsulların düzgün yerləşdirilməməsi, satıcının məhsulların təhlükəsizliyi üçün lazımi şəraiti təmin etməməsi və s.

Lakin sözügedən hal qəsdən baş veribsə, o zaman məsuliyyət daşıyırsınız və buna görə də dəymiş ziyanı ödəməlisiniz.