Paytaxtın Xətai rayonu Qaçaq Nəbi küçəsində piyada səkisinin hesabına parkinq yaradılmasını əks etdirən görüntülər yayılıb.

Liderxeber.az xəbər verir ki, görüntülərə əsasən binalardan birinin qarşısında gecə saatlarında parkinq yeri hazırlandığı məlum olur.

Parkinqin səkinin hesabına təşkil edilməsi isə narazılıq yaradıb. Bildirilib ki, bu kimi dəyişikliklər piyadaların hərəkət təhlükəsizliyini pozur, həm də küçədə nəqliyyatın axınına maneə olur.

Məsələ ilə bağlı Azərbaycan Yerüstü Nəqliyyat Agentliyindən sorğumuza cavab olaraq bildirildi ki, AYNA, Avtomobil Yolları Dövlət Agentliyi və Bakı Şəhər İcra Hakimiyyəti tərəfindən sözügedən ərazidə səkinin qanunsuz zəbt edilməsinin qarşısı alınıb və bərpası həyata keçirilir.