Türkiyədə bir çox məşhurların meneceri olan Ayşə Barımla bağlı "Gezi" istintaqında şahid kimi ifadə verən məşhur aktyorlar Halit Ergenç və Rıza Kocaoğlunun işi məhkəməyə göndərilib.

"Muhteşem Yüzyıl"ın ulduzu üçün 2 ildən 4 ilə qədər həbs cəzası tələb olunur.

Liderxeber.az bu barədə "Haber Global"a istinadla xəbər verib.

Bildirilir ki, Ergençə qarşı Ayşe Barım məhkəməsində "yalançı şahidlik" maddəsi ilə ittihamnamə hazırlanıb və qiymətləndirilmək üçün İstanbul Cəza Məhkəməsinə göndərilib.

Aktyorun özü bununla bağlı açıqlama verməyib.

Xatırladaq ki, ötən günlərdə Ayşe Barım haqqında "Gezi Parkı" etirazlarının planlaşdırıcılarından olduğu iddiası ilə istintaq başladılıb. Onun menecerlik etdiyi səkkiz aktyor, o cümlədən Halit Ergenç, Bergüzar Korel, Nehir Erdoğan, Dolunay Soysert, Rıza Kocaoğlu, Mehmet Günsür, Ceyda Düvenci və Nejat İşler şahid qismində ifadə veriblər. Onların arasında Halit Ergenç və Rıza Kocaoğlu haqqında "yalançı şahidlik" ittihamı ilə istintaq başlanılmışdı. Adıçəkilən aktyorlar müstəntiqlərə "Gezi Parkı" etirazlarına öz iradələri ilə qatıldıqlarını söyləmələrinə baxmayaraq, hadisələr başladığı dövrdə Barım ilə sıx əlaqədə olduqları müəyyən edilib. Bununla yanaşı, onların Barımı qorumaq məqsədilə yalan ifadə verdikləri vurğulanıb.