"Bu il Azərbaycan Beynəlxalq Avtomobil daşıyıcıları Assosiasiyası (ABADA) beynəlxalq yükdaşımalarda daha bir nailiyyət əldə edib. Assosiasiyaya üzv olan “RH Trans” şirkətinə məxsus iki yük avtomobilinin də qatıldığı karvan ilk dəfə birbaşa olaraq Çindən Azərbaycana yük gətirib".

Liderxeber.az xəbər verir ki, bu barədə ABADA-nın Baş Katibi Kənan Qurbanov Assosiasiyanın cari il ərzində həyata keçirdiyi tədbirlər, yeni lahiyələr və görülən işlər barədə hesabatla çıxışı zamanı bildirib.

O qeyd edib ki, əvvəllər Çin və Azərbaycan arasında avtomobil nəqliyyatı ilə birbaşa daşımalar həyata keçirilmirdi. Yüklərin daşınması, əsasən, qonşu ölkələrin ərazilərində, bir ölkənin nəqliyyat vasitəsindən digər ölkənin nəqliyyat vasitəsinə yüklənmə yolu ilə həyata keçirilirdi.

Kənan Qurbanov onu da vurğulayıb ki, 2024-cü ildə Azərbaycan və Çin arasında avtomobil nəqliyyatı ilə beynəlxalq yükdaşımaların reallaşdırılması üçün “İcazə” blanklarının mübadiləsi həyata keçirilib. Bununla da Azərbaycan daşıyıcılarının avtomobil nəqliyyatı ilə beynəlxalq yükdaşımaları coğrafiyası daha da genişlənərək yükdaşıma fəaliyyəti göstərilən ölkələrin sayı 51-ə çatıb.