Bu gün UEFA Konfrans Liqasında pley-off mərhələsinə start verilib.

LiderXəbər xəbər verir ki, turnirdəki təmsilçimiz "Qarabağ" da bu mərhələdə ilk matçına çıxıb. Bu, 2023-cü ildə Ağdam təmsilçisinin Avropa kuboklarında ilk oyunu olub.

Qurban Qurbanovun komandası Bakıda Belçika "Gent"ini qəbul edib və 1:0 hesabı ilə qalib gəlib. Ağdam təmsilçisi bu vacib matça ciddi itkilərlə çıxıb. Əsas qapıçı Şahruddin Məhəmmədəliyev və müdafiəçi Abbas Hüseynov zədə səbəbindən bu oyunu buraxıb. Mərkəz müdafiəçisi Kevin Medina isə cəzalı durumda olduğundan komandasına kömək edə bilməyib.

Qeyd edək ki, komandalar arasında cavab matçı fevralın 23-də Belçikada keçiriləcək.

Xatırladaq ki, "Gent" Belçika çempionatında hazırda 39 xalla 5-ci pillədə qərarlaşıb.

16 fevral

UEFA Kofrans Liqası

Pley-off

21:45. "Qarabağ" (Azərbaycan) - "Gent" (Belçika) - 1:0 

Qol: Leandro Andrade, 78

Hakimlər: Mohammed Al-Hakim, Fredrik Klyver, Robin Vilde (İsveç)

Reallaşdırılmayan penalti: Ramil Şeydayev, 52 ("Qarabağ")

Bakı.Tofiq Bəhramov adına Respublika stadionu