"İngiltərənin "Mançester Siti" klubunun hazırkı baş məşqçisi Xosep Qvardiola "Barselona"dakı işi ilə futbola ziyan vurub".

Liderxeber.az-ın "Sportskeeda"ya istinadən məlumatına görə, bu fikri "Barselona"nın heyətində İspaniyanın onqat çempionu, səkkizqat "Qızıl top" mükafatı sahibi argentinalı Lionel Messi bildirib.

Qvardiola 2008-2012-ci illərdə "Barselona"da çalışıb. Baş məşqçi kimi o, klubla 14 kubok qazanıb.

"Qvardiola başqa bir dünyadır, o, başqalarının görmədiyini görür. O, futbolu dəyişdi. Hamı bizə bənzəmək istəyirdi. Əslində, bu yolla o, bilmədən oyuna ziyan vurdu: insanlar "Barselona" kimi oynamağa çalışırdılar, amma bunu necə etməyi başa düşmürdülər. Bizim yarımmüdafiədə Xavi, Andres İnyesta və Serxio Buskets ilə xüsusi komandamız var idi, bu, məşqçi və oyunçuların ideal birləşməsi idi", - deyə Messi vurğulayıb.

Xatırladaq ki, 53 yaşlı Qvardiola 2016/17 mövsümündən "Mançester Siti"yə rəhbərlik edir. Onun rəhbərliyi altında komanda altı dəfə İngiltərə çempionu olub, iki dəfə İngiltərə Kubokunu qazanıb, dörd dəfə Liqa Kubokunda, üç dəfə İngiltərə Superkubokunda qalib gəlib. 2023-cü ildə "Mançester Siti" Çempionlar Liqasını, UEFA Superkubokunu və klublar arasında dünya çempionatını qazanıb. Əvvəllər Qvardiola İspaniyanın "Barselona" və Almaniyanın "Bavariya" klublarını çalışdırıb. İspaniyalı mütəxəssisin rəhbərliyi altında "Bavariya" üç dəfə Almaniya çempionu olub, iki dəfə ölkə kubokunu, bir dəfə UEFA Superkubokunu və klublar arasında dünya çempionatını qazanıb.

Futbolçu kimi Qvardiola "Barselona"nın heyətində altı dəfə İspaniya çempionu, iki dəfə ölkə kubokunu və UEFA Superkubokunu, bir dəfə Avropa çempionlar kubokunu (hazırkı Çempionlar Liqası) və UEFA Kuboklar Kubokunu (indiki Avropa Liqası) qazanıb. 1992-ci ildə İspaniya yığmasının tərkibində Olimpiya çempionu olub.