İran İslam Respublikasının rəhbərliyi ABŞ Prezidenti Donald Tramp administrasiyası ilə birbaşa danışıqlara başlamaq üçün heç bir səbəb görmür.

Liderxeber.az xəbər verir ki, bu barədə İslam Respublikasının Xarici İşlər Nazirliyinin rəhbəri Abbas Əraqçi bildirib.

O, qeyd edib ki, İranın dondurulmuş aktivlərinin blokdan çıxarılması Tehran və Vaşinqton arasında etimadın bərpası üçün ilk addım ola bilər.

"Bunun baş verməsi üçün səbəb olmalıdır. Hazırda mən bunun üçün heç bir səbəb görmürəm. Amma təbii ki, onların hansı siyasət yürüdəcəklərini, dialoq üçün zəmin olub-olmayacağını görmək lazımdır", - nazir deyib.

A.Əraqçi qeyd edib ki, əvvəllər ABŞ ilə birbaşa danışıqlar aparılıb: “Bizim onlarla daimi təmaslarımız oldu, ABŞ rəhbərliyi razılaşmadan çəkilməyə qərar verdi və məndə etibar azalıb. Mən demirəm ki, inamı bərpa etmək mümkün deyil, amma çətindir”.

"Biz inamsızlıq içindəyik" deyən Əraqçi əlavə edib ki, ABŞ tərəfindən müxtəlif yurisdiksiyalarda dondurulmuş İran aktivlərinin kilidinin açılması etimadın bərpası üçün ilk addım ola bilər. "Bir və ya iki addımın etimadı bərpa edəcəyini deyə bilmərəm, çünki bizim münasibətlərimiz çətin yoldan keçib. Düşünürəm ki, Birləşmiş Ştatlar buna nail olmaq üçün nə edilməli olduğunu hamıdan yaxşı bilir", - o, sözlərinə davam edib.