Braziliya Federal Polisi ölkə Prezidenti Luis İnasio Lula da Silvanın həyatına sui-qəsd cəhdi ilə bağlı araşdırmalara başlayıb.

Liderxeber.az-ın xəbərinə görə, bu barədə yerli "Terra" nəşri məlumat verir.

Qeyd olunur ki, prezidentin həyatı üçün təhlükə barədə məlumat polisə yanvarın əvvəlində daxil olub. Məlumatda hələlik şəxsiyyətləri müəyyən edilməmiş əlaltıların Lula da Silva, eləcə də Braziliya Federal Ali Məhkəməsinin hakimi Aleşandr de Moraysın həyatına sui-qəsd etmək istədikləri bildirilib.

Polis hesab edir ki, sui-qəsdin təşkilatçıları partlayıcı maddələr, qumbaralar və ABŞ-nin iriçaplı "Barrett M82" tüfənglərindən istifadə etməyi planlaşdırıblar. Ölkənin səlahiyyətli orqanları Lula da Silva və de Moraysın həyatı üçün təhlükənin tam şəkildə aradan qaldırılmasına nail ola bilib-bilmədikləri barədə hələ ki məlumat verməyiblər.

Qeyd edək ki, 2024-cü ilin noyabrında Braziliya hüquq-mühafizə orqanları mütəşəkkil cinayətkar qrup yaratmaq və 2022-ci ildə dövlət çevrilişinə cəhd şübhəsi ilə artıq bir neçə zabitə və respublikanın keçmiş lideri (2019-22) Jair Bolsonaruya qarşı istintaqa başlayıb.

Qurumun hesabatına əsasən, sui-qəsdçilər seçkidə Bolsonaruya qalib gəlmiş Lula da Silvanın 2023-cü il yanvarın 1-nə təyin edilmiş andiçmə mərasimini pozmaq istəyib, hakimiyyətə gələn liderin öldürülməsinin mümkünlüyünü müzakirə edib, lakin heç cür öz planlarını həyata keçirməyiblər.