"Acqarına soyuq su içmək həzm prosesini poza və mədəyə zərər verə bilər".

Liderxeber.az xəbər verir ki, bunu terapevt Anna Furqal TASS agentliyinə mədə-bağırsaq traktına mənfi təsir göstərən geniş yayılmış səhər vərdişindən danışarkən bildirib.

Furqal ilk qida qəbulundan əvvəl soyuq su içməyi həzm sistemi üçün zərərli vərdiş adlandırıb. Onun sözlərinə görə, bu, mədə spazmına səbəb ola bilər.

"Soyuq su, xüsusən də buzlu su hələ tam oyanmamış mədəyə daxil olduqda spazma yol aça bilər. Orqanizm mayeni qızdırmaq üçün əlavə resurslar sərf etməli olur ki, bu da potensial olaraq həzm prosesini poza bilər", - deyə həkim izah edib.

O əlavə edib ki, səhərlər müntəzəm olaraq soyuq su içmək diş minasının vəziyyətinə də mənfi təsir göstərə bilər.

Həkimin sözlərinə görə, yuxudan oyandıqdan sonra otaq temperaturunda olan və ya 40 dərəcəyədək qızdırılmış su içmək daha faydalıdır. Bundan əlavə, tünd olmayan yaşıl və ya qara çay, bitki çayları, eləcə də quru meyvələrdən hazırlanmış kompot sağlamlıq üçün yararlı hesab olunur.