İsveçrənin Baden şəhərində qeyri-adi ictimai nəqliyyat layihəsi istifadəyə verilib.

Liderxeber.az xəbər verir ki, “Sıfır Xətti” (“Linie Null”) adlanan avtobusun nə sabit marşrutu, nə də müəyyən olunmuş son dayanacağı var.

Sürix yaxınlığında fəaliyyətə başlayan layihə şəhər rəhbərliyi, rəssamlar Frank və Patrik Riklin qardaşları, eləcə də, Baden-Vettinqen Regional İctimai Nəqliyyat Şirkətinin (RVBW) əməkdaşlığı ilə həyata keçirilib.

Layihənin müəllifləri bildirirlər ki, məqsəd sərnişinləri bir nöqtədən digərinə ən qısa müddətdə çatdırmaq deyil, şəhəri fərqli prizmadan kəşf etmək və səfərin özünü təcrübəyə çevirməkdir.

Avtobusun ön hissəsində “Linie Null” yazısı yerləşdirilib. Bu isə sərnişinlərə əvvəlcədən xəbərdarlıq edir ki, söhbət adi ictimai nəqliyyat vasitəsindən deyil, hərəkət edən bir sənət layihəsindən gedir.

Təşkilatçıların sözlərinə görə, “Sıfır Xətti” müasir şəhər həyatının sürətinə alternativ təqdim edir. Layihə insanları vaxt təzyiqindən uzaqlaşmağa, səyahətin özündən zövq almağa və şəhərə fərqli baxış bucağından nəzər salmağa təşviq edir.