ABŞ Prezidenti Donald Tramp Yaxın Şərqin bir neçə ölkəsinin, o cümlədən Pakistanın liderləri ilə telefon danışığı zamanı onları Vaşinqtonla Tehran arasında sülh sazişi əldə olunacağı təqdirdə, İsraillə münasibətlərin normallaşdırılmasını nəzərdə tutan "İbrahim sazişləri"nə qoşulmağa çağırıb.

Liderxeber.az xəbər verir ki, bu barədə iki ABŞ məmuruna istinadən "Axios" portalı məlumat yayıb. Bildirilib ki, Ağ Ev lideri mayın 23-də Bəhreyn, Misir, İordaniya, Qətər, BƏƏ, Pakistan, Səudiyyə Ərəbistanı və Türkiyə liderləri ilə telefon danışığı zamanı İran münaqişəsi başa çatdıqdan sonra "İbrahim sazişləri"ndə iştirak etməyən və ya İsraillə sülh müqaviləsi olmayan ölkələrin Təl-Əvivlə münasibətlərini yaxşılaşdıracaqlarına ümid etdiyini bildirib.

Portalın xəbərinə görə, İsraillə diplomatik əlaqələri olmayan Qətər, Pakistan və Səudiyyə Ərəbistanı nümayəndələri Trampın bu xahişindən təəccübləniblər. "Axios"a danışan məmurlardan biri qeyd edib ki, telefon danışığı zamanı sükut yaranıb və Tramp zarafatla "xətdəsinizmi", - deyə soruşub. ABŞ lideri əlavə edib ki, yaxın həftələrdə həmin ölkələr və İsrail arasında münasibətlərin normallaşdırılması məsələsi ilə prezidentin xüsusi elçisi Stiv Uitkoff, eləcə də iş adamı Cared Kuşner məşğul olacaqlar.

Daha əvvəl ABŞ prezidenti "Truth Social" platformasında İranın da gələcəkdə "İbrahim sazişləri"nə qoşulmaq istəyə biləcəyini istisna etməyib. Qeyd edək ki, "İbrahim sazişləri" 2020-2021-ci illərdə ABŞ-nin vasitəçiliyi ilə İsrail və bəzi ərəb ölkələri tərəfindən əldə olunub. 2020-ci ildə Bəhreyn, Mərakeş və BƏƏ İsraillə münasibətlər qurmağa başlayıblar.

2021-ci ildə isə Sudan yəhudi dövləti ilə diplomatik əlaqələr yaratdığını elan edib. Bu sazişlər bağlanana qədər İsrailin ərəb dövlətlərindən yalnız Misir və İordaniya ilə diplomatik münasibətləri mövcud idi.