ABŞ hakimiyyəti və Pakistan vasitəçiləri İranın ali lideri Müctəba Xameneinin münaqişənin nizamlanması üzrə son təklifə cavabını gözləməkdədirlər.

Liderxeber.az-ın xəbərinə görə, bu barədə "Axios" portalı məlumat verib.

Məlumata görə, İran liderindən həmçinin danışıqlarda öz nümayəndə heyəti üçün dəqiq təlimatlar verməsini gözləyirlər.

Portalın İsrail mənbələrindən biri əminliyini ifadə edib ki, Xamenei öz cavabını məhz aprelin 22-də verəcək. Mənbə bildirib ki, İran təmsilçiləri hələlik sərbəst şəkildə addım ata bilmirlər. Onlar bəyan ediblər ki, öz ali liderlərindən "yaşıl işıq" gözləyirlər.

Nəşrin məlumatına görə, İran rəhbərliyi daxilində son bir neçə gündə Vaşinqtonla dialoqun necə düzgün qurulması ilə bağlı gərgin müzakirələr aparılıb. Danışıqlar masası arxasında qurulacaq strategiya ilə bağlı aktiv və intensiv məsləhətləşmələr olub. Ölkə daxilində ABŞ ilə əlaqələrə dair müzakirələrə gərginliyin pik həddə çatdığı bildirilir.