Buzlu su çox vaxt arıqlamaq üçün "möcüzəvi vasitə" və istidən qorunma üsulu kimi təqdim olunur.

Liderxeber.az xəbər verir ki, rusiyalı diyetoloq İrina Pisaryeva RT-yə açıqlamasında bu populyar mifləri təkzib edərək buzlu suyun sağlamlıq üçün yarada biləcəyi real risklərdən danışıb.

Mütəxəssis bildirib ki, orqanizmin buzlu suyu qızdırmaq üçün kalori sərf etməsi nəzəriyyəsinin elmi əsası olsa da, nəticə gözlənilən deyil: "Hesablamalar göstərir ki, iki litr buzlu suyu bədən temperaturuna qədər qızdırmaq üçün cəmi 70 kalori tələb olunur. Bu rəqəm çəki itirmək üçün o qədər kiçikdir ki, buzlu suyu "yağyandırıcı" içki hesab etmək mənasızdır".

Diyetoloqun fikrincə, məşqdən sonra və ya isti havada sərinləmək üçün buzlu su içməyin zərərləri xeyrindən daha çoxdur:

- İsti çaydan və ya yeməkdən dərhal sonra buzlu su içmək diş minasında mikroçatların yaranmasına səbəb olur.

- Qıcıqlanmış bağırsaq sindromu və ya digər mədə-bağırsaq xəstəlikləri olan şəxslərdə buzlu su əzələ spazmını və şiddətli ağrıları tətikləyə bilər.

- Angina və xroniki tonzillitdən əziyyət çəkənlərə buzlu su qətiyyən tövsiyə edilmir, çünki bu, xəstəliyin kəskinləşməsinə və soyuqlamaya səbəb olur.

Həkim qeyd edib ki, kəskin temperatur fərqi orqanizm üçün ciddi stresdir və sağlamlıq problemləri olan şəxslər üçün bu vərdiş təhlükəli ola bilər.