ABŞ-nin Səudiyyə Ərəbistanındakı səfirliyinin ərazisində Mərkəzi Kəşfiyyat İdarəsinin məntəqəsinə dron hücumu olub.

Liderxeber.az xəbər verir ki, bu barədə "The Washington Post" mənbələrə istinadən məlumat yayıb.

Xəbərə görə, hadisə nəticəsində xəsarət olan olmayıb.

Buna qədər, martın 3-də İran ABŞ-nin Səudiyyə Ərəbistanındakı səfirliyinə hücum edib. Nəticədə diplomatik missiyanın binalarından birində dam örtüyü qismən çöküb və səfirliyin fəaliyyəti növbəti xəbərdarlıqlara qədər dayandırılıb.

Xatırladaq ki, fevralın 28-də İsrailin müdafiə naziri İsrael Kats İsrail Müdafiə Qüvvələrinin İrana qabaqlayıcı zərbə endirdiyini açıqlayıb. Daha sonra ABŞ Prezidenti Donald Tramp ölkəsinin də İrana qarşı hərbi əməliyyatda iştirak etdiyini bildirib.

İran isə öz növbəsində İsrailə onlarla ballistik raket atıb. İsrail Müdafiə Qüvvələri atışları təsdiqləyib, ölkə daxilində sirenlər səslənib və hava hücumundan müdafiə sistemləri işə salınıb.

Martın 1-də İranın Ali Lideri Əli Xameneinin hücumlar zamanı öldürüldüyü bəyan olunub.

İran ABŞ-nin hərbi bazalarının yerləşdiyi qonşu ölkələrin əksəriyyətinə raket zərbələri endirib. Buna görə də həmin ölkələrdə hava məkanı müvəqqəti bağlanıb.