"Tokyo Electric Power" (TEPCO) şirkəti Yaponiyanın Niigata prefekturasında yerləşən, dünyanın ən böyük atom elektrik stansiyası olan "Kashiwazaki-Kariwa" Atom Elektrik Stansiyasının 6-cı blokunda elektrik enerjisinin istehsalı və ötürülməsini sınaqdan keçirməyə başlayıb.

Liderxeber.az TASS-a istinadən xəbər verir ki, bu barədə Yaponiyanın enerji şirkəti məlumat yayıb.

"Kashiwazaki-Kariwa" Atom Elektrik Stansiyasının 6-cı bloku Fukuşima qəzasından sonra 14 il ərzində ilk dəfə elektrik ötürməyə başlayıb. Güc optimal səviyyəyə çatana qədər tədricən artırılacaq. Tam kommersiya istismarının isə martın 18-də başlaması planlaşdırılır.

Yanvar ayında idarəetmə çubuqları ilə bağlı sınaq zamanı yaranan avadanlıq problemləri reaktorun işə salınmasını gecikdirmişdi. TEPCO fevralın 9-da reaktoru ikinci dəfə işə salıb. Təhlükəsizlik sistemindəki nasazlığın stansiya və ətraf mühit üçün risk yaratmadığı bildirilib.

Hazırda Yaponiyada 14 nüvə reaktoru fəaliyyət göstərir və onların sayının tədricən artırılması nəzərdə tutulur.