HƏMAS hərəkatının hərbi qanadı “İzzəddin əl-Qəssam Briqadaları”nın Qəzza zolağının İsrailin nəzarətində olan bölgəsində qalan üzvləri Türkiyə ərazisinə köçürülə bilər. 

Liderxeber.az xəbər verir ki, bu barədə HƏMAS-a yaxın olmağı ilə seçilən “Maan” agentliyi məlumat yayıb. 

Məlumata görə, vasitəçilər Qəzzada İsrail qüvvələri ilə HƏMAS arasındakı “sarı xətt” (təmas xətti - red.) xaricində, əsasən anklavın cənubundakı Rəfah şəhəri rayonunda olan hərəkat üzvlərinin Türkiyə ərazisinə və daha sonra regionun bir neçə ölkəsinə paylanması üçün mümkün yerdəyişmə planı hazırlayırlar.

Məsələ ilə bağlı məsləhətləşmələrin ABŞ, Türkiyə və digər dövlətlərin nümayəndələri arasında, lakin İsrailin iştirakı olmadan aparıldığı bildirilir. Bununla belə, İsrailin belə bir əməliyyatın həyata keçirilməsinə etiraz etmədiyi vurğulanır. 

Müxtəlif mənbələrin məlumatına görə, Qəzzanın İsrail qüvvələrinin nəzarətində olan hissəsindəki yeraltı tunellərdə 50-300 arası HƏMAS silahlısı var. 

Xatırladaq ki, oktyabrın əvvəli Misir, Qətər, ABŞ və Türkiyənin vasitəçiliyi ilə İsraillə HƏMAS arasında atəşkəslə bağlı saziş imzalanıb.