Baltik dənizində NATO-nun "Baltops-2025" təlimləri başlayıb.

Liderxeber.az-ın Gazeta.ru-ya istinadən xəbərinə görə, bu barədə Polşa Müdafiə Nazirliyi yanında Hərbi Nəşriyyat İnstitutundan (Wojskowy Instytut Wydawniczy, WIW) məlumat verilib.

Məlumata görə, bu il manevrlərdə 50-yə yaxın müxtəlif tipli gəmi iştirak edəcək. Cənubi Avropada yerləşən ABŞ-nin 6-cı donanması təlimlərə "USS Mount Whitney" komandanlıq gəmisini göndərib. Almaniya "FGS Bayern" freqatı, Böyük Britaniya isə "P2000" patrul gəmilərindən ibarət böyük qrupla iştirak edəcək.

Həmçinin, Polşanın "ORP General T. Kosciuszko" raket freqatı və "ORP Kaszub" korveti, "ORP Mamry" və "ORP Naklo" iki minaaxtaran gəmisi də artıq Almaniyanın şimal-şərqindəki Rostok şəhərinə gəlib.

İnstitutdan bildirilib ki, təlimlərin iştirakçıları iki həftə ərzində Baltik dənizinin cənub hissəsindəki geniş ərazilərdə - Danimarka boğazları və Yutlandiya yarımadasından Qdansk körfəzinə qədər olan bölgədə çalışacaqlar. Hərbi dəniz poliqonlarında bir sıra gəmilərin ekipajları artilleriya atəşi həyata keçirəcəklər. Təlimlərə gəmilərlə yanaşı hərbi aviasiya da cəlb olunacaq.