Donald Tramp Administrasiyasının idxal olunan avtomobillərə 25 faizlik rüsum tətbiq etməsi ABŞ limanlarının bu avtomobillərlə dolub-daşmasına səbəb olub.

Liderxeber.az-ın xəbərinə görə, bu barədə "Financial Times" (FT) nəşri məlumat verib.

Məlumata görə, bəzi limanlarda artıq bir neçə həftədən sonra vəziyyət kritikləşə bilər.

"Avtomobillərin satış (diler) mərkəzlərinə çatdırılmasının dayandırılmasını xahiş edən avtomobil istehsalçıları ABŞ və onların ticarət tərəfdaşları arasında hər hansı kompromisin əldə edilib-edilməyəcəyini gözləyirlər", - deyə FT sənaye sahəsinin rəhbərlərindən birinin sözlərini sitat gətirib.

Sənayenin bir çox nümayəndələri hələ də Trampın idxal olunan avtomobillərə tətbiq etdiyi rüsumların uzun müddət qüvvədə qalmayacağına ümid edirlər və bu da onlardan bəzilərini Avropa zavodlarından və ya limanlarından avtomobil tədarükünü dayandırmağa vadar edib.

Limanlarda avtomobillərin saxlanılması üçün ödənişlər yüksəkdir, buna görə də ixracatçılar nəqliyyat vasitələrini imkan daxilində ABŞ-nin gömrük anbarlarına aparmağa çalışırlar ki, burada rüsum ödəmədən müvəqqəti olaraq saxlaya bilsinlər. Bununla belə, ekspertlərin fikrincə, hətta dəmir yolu ilə gətirilən Kanada istehsalı bəzi avtomobillər Detroyt limanının girişində ilişib qalıblar.

Xatırladaq ki, Donald Tramp aprelin 2-də 185 ölkə və ərazidən olan məhsullara gömrük rüsumunun tətbiq ediləcəyini açıqlamışdı. 10%-lik universal rüsumlar aprelin 5-dən qüvvəyə minib, fərdi rüsumlar isə aprelin 9-dan qüvvəyə minəcək. Bundan əlavə, aprelin 3-dən ABŞ administrasiyası bütün idxal olunan avtomobillərə 25%-lik gömrük rüsumları tətbiq edib.