"Sumqayıt Hospital" yaşa, əlilliyə, ailə başçısını itirməyə görə pensiya alan, istənilən növ müavinət, təqaüd və kompensasiya alan şəxslər, sosial yardım alan ailələr, Vətən müharibəsi iştirakçıları və şəhid ailələri üçün xüsusi endirimlər təklif edir.

Bunun üçün sosial ödəniş alan şəxslər xidmətlərdən istifadə zamanı mütləq pensiya, müavinət, sosial yardım, təqaüd və kompensasiya aldıqları kartla nağdsız qaydada ödəniş etməlidirlər. Peşəkar tibb heyəti, beynəlxalq təcrübəyə malik həkimləri ilə həftənin bütün günləri, günün 24 saatı ərzində vətəndaşların xidmətində olan və ən son texnoloji avadanlıqlarla təchiz edilmiş bu hospitalda müayinə və müalicə zamanı endirimli qiymətlərdən faydalana bilərsiniz.

Yolunuzu "Accessorize", "Bebe", "Calvin Klein", "Coccinelle", "Liu Jo", "Monna Lisa", "Monsoon", "Pablosky", "Sisley", "Tommy Hilfiger", "United Colors Of Benetton" mağazalarından salaraq alış-veriş edib sosial ödəniş kartı ilə nağdsız qaydada ödəniş etsəniz, sizə endirimlər tətbiq olunacaq.

Pensiya, müavinət, sosial yardım, təqaüd və kompensasiya alan şəxslərə "Almond Kulinariya" da endirimlər təklif edir. Burada tort və digər şirniyyat növləri sosial ödəniş alanlara endirimli qiymətlərlə təklif olunur.

Bakıda və Gəncədə fəaliyyət göstərən "Əjdaha Dönər" də sosial tərəfdaşlar sırasındadır. Bu məkanda dönər, lahmacun, pizza və burgerlər sosial ödəniş alan şəxslərə endirimli qiymətlərlə təklif olunur.

Endirimli alış-veriş, müayinə və müalicə fürsətlərindən yararlanmaq üçün pensiya, müavinət, kompensasiya və yaxud sosial yardım aldığınız kartla nağdsız qaydada ödəniş etməyi unutmayın.

Qeyd edək ki, bu günədək sosial ödəniş alan şəxslər tərəfdaş şirkətlərdən nağdsız qaydada, yəni sosial ödəniş kartları vasitəsilə 890 mindən çox alış-veriş edib, təklif olunan endirimlərdən faydalanıblar.

Çoxsaylı endirimlər təklif edən digər şirkətlərlə www.sosialterefdash.az saytına daxil olaraq, "Partnyorlar" bölməsində tanış olmaq mümkündür.