Azərbaycan İqtisad Universitetinin (UNEC) Dərbənd filialının məzunları diplomlarını ala bilmirlər.
Bu barədə maliyyə ixtisasında təhsil almış və məzun olan tələbələr şikayətlərini bildiribər.
Onlar bildirirlər ki, Rusiya vətəndaşları diplomlarını aldı, lakin azərbaycanlı 70 tələbə hələ də sənədləri ala bilmirlər:
"2020-ci ildə UNEC-in Dərbənd filialına qəbul olunmuşam. Qiyabi qəbul olanlar beş il, əyanilər isə dörd il təhsil alır. Nə biz 2024-cü il məzunları, nə də ki, 2023-cü il məzunları olan tələbələr diplomlarını ala bilirlər. Elm və Təhsil Nazirliyinə müraciət edirik. Bizə cavab verilir ki, siz Dövlət İmtahan Mərkəzinin keçirdiyi qəbul imtahanında iştirak edərək qəbul olmamısınız deyə, tələbələrin qəbulu, tədris prosesi, diplom verilməsi araşdırılır.
Biz 2023-2024 -cü il məzunları olaraq 70 tələbəyik. Hamımız da kəsrsiz tədris müddətini başa vurmuşuq. Rektor tərəfindən müvəffəqiyyətlə məzun olduğumuza dair arayış verilib. Artıq iki ilə yaxındır araşdırma aparılır. İki ildir 70 tələbəni araşdırıb bitirə bilmirlər?
Bəlkə də şübhə duyulur ki, biz karantin müddətində dərsdə iştirak etməmişik. Amma belə bir hal baş verməyib. Bütün tələbələr təyyarə ilə Mahaçqalaya, oradan da Dərbəndə gediblər. Qroznıya, Mineralnıye Vodıya da uçmuşuq. Bir saat ərzində belə bütün məzunların məlumatlarını araşdıra bilərlər.
Hətta qəzadan sonra Dağıstana təyyarə uçmadı. Tələbələrin adları Dövlət Sərhəd Xidmətinə verildi. Tələbələr quru sərhəd ilə Dağıstana getdi. Biz çətinliklərə baxmayaraq, dərslərimizi buraxmadıq, əziyyətlə yollarda qalıb oxuduq, indi də diplom ala bilmirik.
Tələbələrin bəzilərinə çağırış gəldi deyə, hərbi xidmətə yollandılar. İndi onlar diplomu yoxdur deyə, bir il altı ay xidmət çəkirlər.
Bizim haqlarımız kobud şəkildə pozulur. Əziyyətimiz yerdə qalır".
Məsələ ilə bağlı UNEC-in İctimaiyyətlə əlaqələr şöbəsinin müdiri Elnarə Məmmədova Liderxeber.az-a açıqlamasında qeyd edib ki, Elm və Təhsil Nazirliyi (ETN) tərəfindən diplom blankları UNEC-ə verilən kimi məzunlara diplomlar təqdim olunacaq:
"Hazırda nazirlik tərəfindən araşdırma aparıldığı bildirilir".
Məsələ ilə bağlı Elm və Təhsil Nazirliyinə də sorğu ünvanlanıb.
Qeyd edək ki, 2016-cı il noyabrın 28-də Azərbaycan Dövlət İqtisad Universitetinin Rusiya Federasiyasının Dağıstan Respublikasının Dərbənd şəhərindəki filialının rəsmi açılışı olub.
Dərbənd filialına qəbul Rusiya Federasiyasının ali təhsil müəssisələrinə qəbul qaydalarına əsasən aparılır.
Maraqlıdır, belə olan halda tələbələrin diplomlarını DİM vasitəsilə qəbul olunmadıqları üçün araşdırma aparılır deyərək, verməmək nə qədər doğru yanaşmadır?
Sualımıza cavab olaraq təhsil məsələləri üzrə ekspert Ramin Nurəliyev bildirib ki, sözügedən filiala qəbul Dövlət İmtahan Mərkəzinin (DİM) qəbul imtahanı əsasında aparılmadığı üçün araşdırma aparılır deyilirsə, bu doğru yanaşma deyil:
"Daha doğru şərh vermək üçün UNEC-in Elm və Təhsil Nazirliyi ilə olan nizamnaməsinə baxmaq lazımdır.
Ümumilikdə, xarici filiallarda qəbul prosesi bir az fərqlidir.
UNEC-in Dərbənd filialının nizamnaməsinə baxmaq lazımdır. Xarici filiallarda proses bir az fərqlidir.
Məsələn, Azərbaycanda M.V.Lomonosov adına Moskva Dövlət Universitetinin, İ.M.Seçenov adına Birinci Moskva Dövlət Tibb Universitetinin filialları var. Bura qəbul Azərbaycanın qəbul qaydaları ilə yanaşı, Rusiyanın özünün keçirdiyi qəbul imtahanı əsasında aparılır.
UNEC-in Dərbənd filialına qəbul da eyni qaydadadır. Tələbə qəbulu həm Azərbaycanın daxili imtahanı, həm də Rusiya qəbul qaydaları əsasında aparılır. Diplomları da UNEC verir. Təhsil Nazirliyi bu diplomları tanımırsa, burada artıq problem var deməkdir.
Nazirlik DİM vasitəsilə qəbul olmamısınız deyə araşdırma aparılır deyirsə, bu, doğru yanaşma deyil. Çünki xarici ölkə vətəndaşı da DİM vasitəsilə qəbul olunmayıb".
Ekspert qeyd edib ki, DİM imtahanları vasitəsilə tələbə qəbulu yalnız ölkə hüdudları çərçivəsində keçərlidir:
"Dərbənd filialı da Azərbaycan ali təhsil müəssisəsinin filialıdır. Azərbaycan ali təhsil müəssisəsi bunu tanıdığı üçün ETN də tanımalıdır. Buna görə DİM-i şərt kimi qoymamalıdır. Çünki DİM-in qəbul imtahanı ölkə hüdudları çərçivəsində keçərlidir. Ölkə hüdudlarından kənarda bu, keçərli deyil. Qurumun vasitəsilə ölkə hüdudlarından kənarda qəbul keçirilə bilməz.
Azərbaycan ali təhsil müəssisələrində ikinci ali təhsil almaq imkanı var. Bura da qəbul DİM vasitəsilə aparılmır. O zaman ETN ikinci ali təhsil alanlara diplom verməməlidir? Bu heç doğru cavab və yanaşma deyil.
Xarici ölkələrdə fililal üçün DİM vasitəsilə tələbə qəbulu keçərli deyil. Çünki ali təhsil müəssisəsi xarici filialda istədiyi formada tələbə qəbulu həyata keçirə bilər.
Düzdür, burada ETN ilə UNEC arasında razılıq nizamnaməsinə baxmaq lazımdır. Buna əsasən müəyyən fikirlər bildirildikdə, daha doğru olar. Lakin ümumi beynəlxalq prizmadan yanaşdıqda, söylədiyim qaydalar keçərlidir".
Onun sözlərinə görə, ETN tələbələrin diplomlarını almalarına dəstək verməlidir:
"Bizim ali təhsil müəssisəmiz o qədər inkişaf edib ki, Rusiyada filialı var. Bu, bizim qürur mənbəyimizdir. Bu gün etibar sarsılarsa, sabah digər tələbələrin qəbulu üçün əngəllər ortaya çıxa bilər. Ona görə də sözügedən məsələnin həlli yolunda ETN tələbələrə dəstək olmalıdır".
Ramin Nurəliyev UNEC-in Dərbənd filialına tələbə qəbulu prosesi barədə də məlumat verib:
"Bu filialın açılmasında məqsəd Dərbənddəki türkdilli xalqların, bizim soydaşlarımızın təhsilinə dəstək verilməsidir. Filial ümummilli lider Heydər Əliyevin təşəbbüsü ilə açılıb.
Qəbul prosesi üç istiqamətdə aparılır. Bizi maraqlandıran əsas iki istiqamətdir. Birincisi türk soylu vətəndaşlar, Rusiyanın digər vətəndaşlarının müraciətidir - bu, daxili imtahan ilə həyata keçirilir. Yəni Rusiya dövlətinin keçirdiyi qəbul imtahanı əsasında aparılır.
İkinci müraciət isə Rusiyadan kənarda qalan xarici tələbələrin müraciətdir. Bu zaman azərbaycanlılar müraciət edə bilər. Burada ayrıca olaraq riyaziyyat, coğrafiya, Azərbaycan dili və rus dilindən imtahan keçirilir, yaxşı nəticə əldə edənlər Dərbənd filialına qəbul oluna bilir.
Filial qanuni olaraq fəaliyyət göstərir. Rusiya tərəfindən də lisenziya verilib".
Xatırladaq ki, sözügedən tələbələr aprelin 3-də Liderxeber.az-a müraciət edərək, diplomlarını ala bilmədiklərini söyləmişdilər.