"Su ilə qarışdırılmış qida sodası mədə yanmasının müalicəsi üçün məşhur xalq təbabəti vasitəsi hesab edilir.

Bu içki sinədə xoşagəlməz yanma hissini aradan qaldırmağa kömək edir. Lakin əslində bu cür "müalicə"nin təsiri qısamüddətli olur, müntəzəm və ya çox böyük dozalarda istifadə edildikdə isə soda orqanizmə ciddi zərər də verə bilər".

Liderxeber.az-ın xəbərinə görə, bu barədə rusiyalı qastroenteroloq və terapevt Sergey Lopatin gazeta.ru-ya müsahibəsində danışıb.

"Biz soda içdikdə mədədə çox miqdarda karbon qazı əmələ gəlir. Bu zaman mədə yanması həqiqətən də dayana bilər. Ancaq daha sonra orqanın divarları qazların təsiri altında genişlənməyə başlayır ki, bu da gəyirmə, narahatlıq və qarında şişkinliyə səbəb olur. Eyni zamanda, mədədə xlorid turşusu ifrazı artır. Nəticədə mədə yanmasının aradan qalxması ilə gələn rahatlıq başqa bir reflükslə əvəz olunur - mədə turşusu qida borusuna daxil olur və mədə yanması yeni güclə qayıdır. Bu effektə "turşu rikoşeti" də deyilir", - deyə həkim bildirib.

Onun sözlərinə görə, bu üsuldan müntəzəm istifadə edildikdə, mədə yanması spazmları daha tez-tez baş verəcək və bu da qida borusunun selikli qişasının zədələnməsinə gətirib çıxaracaq. Sodanın nəzarətsiz şəkildə istehlakı, həmçinin mədə xorası və qastritin kəskinləşməsi baxımından da təhlükəlidir.

"Sodadan sui-istifadə eyni dərəcədə təhlükəli olan başqa nəticəyə də gətirib çıxara bilər ki, bu da bədəndə su-duz balansının pozulmasıdır. Sodanın tərkibində natrium var və onun artıq olması bədəndə mayenin saxlanmasına və şişkinliyə səbəbiyyət verə bilər. Bu, böyrək və ürək-damar xəstəlikləri, o cümlədən hipertoniya xəstəliyi olan insanlar üçün xüsusilə təhlükəlidir. Turşuluğu neytrallaşdıran və ya mədə şirəsinin ifrazını ləngidən əczaçılıq preparatlarından istifadə etmək daha təhlükəsiz və effektivdir. Əgər mədə yanması spazmları müntəzəm olaraq təkrarlanırsa, o zaman sadəcə simptomla mübarizə aparmaq yerinə, qastroenteroloqa müraciət etmək və problemin səbəblərini aydınlaşdırmaq daha məqsədəuyğundur", - deyə Sergey Lopatin qeyd edib.