Müdafiə Sənayesi Nazirliyinin Milli Aerokosmik Agentliyinin baş direktoru professor Natiq Cavadov və əməkdaşlar 20 noyabr 1991-ci ildə Qarabağda Ermənistan separatçıları tərəfindən vurulmuş helikopter qəzasında şəhid olmuş akademik Tofiq İsmayılovun məzarını ziyarət ediblər.
REYD xəbər verir ki, ziyarət iştirakçıları öncə mərhumun məzarı üstünə əklil və gül dəstələri qoyub. Sonra professor Natiq Cavadov akademik Tofiq İsmayılov haqqında öz xatirələrini bölüşüb, onun Azərbaycan elmi və kosmik sənayesi üçün həyata keçirdiyi işlər barədə ətraflı məlumat verib. O, qeyd etdi ki, Milli Aerokosmik Agentliyi Ulu Öndər Heydər Əliyevin dəstəyi və təşəbbüsü ilə yaradılıb və akademik Tofiq İsmayılovun rəhbərliyi altında böyük nailiyyətlər qazanıb. Bu gün də Milli Aerokosmik Agentliyi öz fəaliyyətini uğurla davam etdirir, kollektiv kosmik tədqiqatların əhatə məkanın genişləndirilməsi yolunda var gücü ilə çalışır.
