Britaniyada Kraliçanı öldürmək istəyən şəxs vətənə xəyanət ittihamını boynuna alıb.
REYD-in London müxbiri xəbər verir ki, Caysvant Sinqx Çeil adlı şəxs 2021-ci il dekabrın 25-də mərhum monarx II Elizabetin Vindzor qəsrində olduğu zaman onu öldürməyə cəhd edib.
Bu gün o, 1842-ci il Xəyanət Aktının ikinci maddəsi üzrə, hücum silahına sahib olmaq və öldürməklə hədələmək ilə bağlı ittihamları boynuna alıb.
Qeyd edək ki, o, Vindzor qəsrinə arbaletlə silahlanaraq getmiş və mühafizə zabitinə “Mən kraliçanı öldürməyə gəlmişəm” demişdi.
21 yaşlı gənc, Böyük Britaniyada 1981-ci ildən bəri dövlətə xəyanətdə mühakimə olunan ilk şəxsdir.
Onun barəsində martın 31-də məhkəmədə hökm oxunmalıdır.